Секојпат кога ќе се сретнат францускиот претседател Емануел Макрон и неговиот американски колега Доналд Трамп, нивното ракување го привлекува вниманието. Низ годините, за време на првиот мандат на Трамп на чело на САД, со оваа тема се занимаваа дури и политичките аналитичари, кои ракувањата, често предолги и со чудни допири, ги толкуваа како невербални манифестации на борбата за примат меѓу двајцата моќни лидери.

За време на нивната денешна средба во Белата куќа, прва во вториот мандат на Трамп, американскиот претседател за време на вклучување во живо на средба со претставници на групата „Г7“ го седна Макрон на ќошот од работната маса на Трамп, што во дел од медиумите беше протолкувано како намерен потег насочен кон понижување на францускиот претседател.

Но, настрана од тоа и од содржината на нивните разговори и пораките кои ги испратија околу војната во Украина и напорите за мировен договор, фокусот на анализите на невербалната комуникација која ја покажаа двајцата претседатели одново беше на нивното ракување. На снимката од пречекот на Макрон, тој и Трамп повторно се поздравија чудно и си ги држеа рацете предолго, како никој да не сака прв да пушти, пишуваат светските медиуми.

„Историјатот“ на чудни поздравувања меѓу Макрон и Трамп е доволно долг за на интернет да има цели компилаци од нивните ракувања, а таков „пресек“ денеска објави и „Би-би-си“.