Пратеникот и претседател на Демократски сојуз, Павле Трајанов вечерва во емисијата „10 Минути“ на ТВ21 порача дека со влезот на Алијанса за Албанците во Владата може „да се наруши етничкиот баланс во Владата“.

Според него, засега парламентарното мнозинство од 64 пратеници е стабилно, но евентуалниот влез на АА во власта, наместо да ги забрза евроинтеграциските процеси, може „да ги усложни работите“ и да го наруши Охридскиот рамковен договор, кој предвидува сите етнички заедници да бидат соодветно застапени. Ова, вели Трајанов, би можело „негативно да се рефлектира на меѓуетничките состојби во државата“.

„Мора да води сметка и претседателот на Владата Ковачевски и другите партнери, Ахмети, Гаши, сите – да формираме Влада којашто навистина ќе одговори на предизвиците,“, рече Трајанов, кој сугерира ДУИ да отстапи министерски места за евентуалните министри од АА.