Африканскиот сив папагал Аполо докажа дека е една од најпознатите птичји ѕвезди на интернет и влезе во Гинисовата книга на рекорди откако препозна повеќе предмети од кој било папагал пред него.

Оваа преслатка птица, која има 2,8 милиони следбеници на ТикТок, успешно именуваше 12 различни предмети и постои голема веројатност дека може да препознае уште повеќе.

„Никогаш не се знае што може да научи Аполо или кои рекорди би можел да ги собори“, изјавија неговите сопственици за Гинисовата книга на рекорди.

Птицата дели дом со двајца црноглави папагали – Солеил и Офелија, кои исто така понекогаш се појавуваат во неговите видеа.

Аполо бил трениран според упатствата на д-р Ајрин Пеперберг, која е една од најпознатите експерти за однесување на животните и која успеала да го научи својот сив папагал Алекс да брои до шест и да препознава широк спектар на предмети и бои.

Папагалите се обучуваат така што едно лице подучува додека друго лице стои до птицата и моделира правилни одговори на поставените задачи. Во случајот на Аполо, неговите учители биле неговите горди сопственици Далтон и Викторија Мејсон, кои велат дека нивната цел е да ја подигнат свеста за природната интелигенција на животните.

Мејсонови првпат го забележале Аполо во декември 2020 година, во локалната продавница за домашни миленици, и веднаш знаеле дека тој ќе стане член на нивното семејство.