Македонската пејачка Тамара Тодевска е актуелна со новата песна „Нијагара“, која е на српски јазик и е наменета за регионалниот пазар. Поради таа причина, таа е на промотивна турнеја ширум регионот, а неодамна гостуваше и во емисијата „Гранд магазин“ на српската телевизија Гранд.

Tаа сподели дека „Нијагара“ настанала во момент на „најголема тага“, односно во периодот кога решила да стави крај на бракот со кошаркарот Александар Димитровски – Мачка. Како што вели и самата, таа не ја донела оваа одлука „преку ноќ“, но денес е среќна што, конечно, е повторно слободна.

„Долго време бев во тој некој ‘кафез’, живеев во некоја агонија, сè се вртеше во круг. Па, зборовите излегоа од мене додека чувствував бес. Додека ги пишував стиховите, ми се врати сè што ми се случуваше во претходниот период. Решив дека ќе го направам првиот чекор и дека ќе излезам од ‘кафезот’. Лесно е ако навистина го сакаш тоа. Тоа е за сите оние кои имале проблем со говорот на омраза, за сите оние кои некогаш биле разочарани, погрешно етикетирани и се наоѓале во безизлезна ситуација“, изјави Тамата за време на гостувањето.

„Ние двајца сè уште сме во брак, но веќе не живееме заедно. Ние сме во одлични односи, имаме две деца и се согласуваме многу подобро од времето кога бевме во брак. Тоа е одлична работа која ја направивме еден за друг“, истакна таа.

Пејачката потенцираше дека имала голема поддршка од семејството и од пријателите.

„За сè постои излез, само треба да веруваш во тоа. Јас не излегов сама од ситуацијата, тука беа моите родители, пријателите, психолозите. Не се срамам од тоа. Најважно од сè е дека излегов од тој ‘кафез’“, заклучи Тамара.