Откако пред осум години изгореа бараките на булевар Партизански одреди, каде дотогаш беа сместени Заводот за урбанизам и архитектура и Институтот за социолошки и политичко-правни истражувања, од минатата есен објектите се обновуваат и до летово, во делот каде се наоѓаше Заводот,  ќе биде отворен новиот ресторан на „Рок кафана Рустикана 2“.

Обновувањето на бараките лоцирани веднаш до ГУЦ „Здравко Цветковски“ и уредувањето на просторот деновиве предизвикува жестоки реакции на социјалните мрежи околу тоа што и како се гради, кој дал дозвола, а по информацијата дека ќе се отвори ресторан и многу прашања во врска со намената која според ДУП е различна од дејноста која таму реално ќе се одвива.

Сопствениците на „Рок кафана Рустикана 2“, Андреја Бојчев, Арманд Вељан и Столе Стоилов велат сѐ е по закон, дека се закупци на објектот и дека немаат што да кријат во целата приказна што е креирана во некои групи по социјалните мрежи, но дека не сакаат да им се направи репутација дека направиле нешто нелегално, откако со години, како што велат, со чесна работа го граделе нивниот бренд.

Објектот којшто ние го изнајмуваме фактички е приватна сопственост и се обновува во постоечкиот капацитет и габарит, како што биле бараките претходно. Сопственикот АД за урбанизам, архитектура и инженеринг „ЗУАС“ го обновува, а ние имаме преддоговор за закуп со клаузула – клуч на рака. Ние само го опремуваме објектот, сѐ што нам ни треба, во смисла столици, маси, шанк, озвучување, осветлување, тоа е наш дел. Обновата пак, сѐ што се градежни работи, ставање панели, покривање, водоводна и електрична инсталација, ПП-заштита, хидрантски мрежи, сопственикот го прави по наш нацрт за да ни биде корисно за работа, затоа што ние ќе бидеме единствени закупци. Сѐ е направено по највисоки стандарди – објаснува едниот од сопствениците, Арманд Вељан.

Преддоговорот за закуп бил склучен во август минатата година, а на терен активно се работи некаде од октомври. Објектот е изнајмен на 10 години, а во еден дел ќе биде сместена голема игротека со посебен влез. Вељан вели дека игротеката неодамна е регистрирана како посебна подружница за да се издвои нејзиното работење од работата на ресторанот.

Во однос на она околу кое најмногу реагираше јавноста, односно дали во објект каде со ДУП е предвидена намена образование може да се врши угостителска дејност, сопствениците велат дека ДУП-от е донесен во 2021 година, а дека објектот, во кој тие се закупци, е купен многу порано. Според нив, веројатно при изработката на планот идејата била да се спречи на овој простор да се изгради зграда, но во случајов не станува збор за изградба туку за обнова во рамките на постоечките бараки.

На прашањето дали им била потребна посебна дозвола за тука да се отвори ресторанот, велат – не, и тврдат дека сѐ е во рамките на законските решенија и според Законот за трговски друштва и според Закон за угостителство.

Има еден дел што е на некој начин спорен, односно не е спорен, но тоа се околу 90 квадрати што влегуваат во иста парцела, кои се наменети за образование. Тој простор е празен и му припаѓа на Институтот за социолошки и политички истражувања. Институтот има елаборат за тој дел и таму ќе прават амфитеатар – вели Вељан.

Пред обновените бараки каде во еден дел ќе биде ресторанот, а во друг игротеката, ќе има летна тараса, паркинг, лулашки. Сопствениците тврдат дека ќе внимаваат и на околината, зачувани биле сите дрва на просторот, а ќе се засадат и нови: Велат дека нема да има гласна музика и дека сакаат од овој простор да создадат еден вид семејно катче. Според нив, преземени се сите мерки за безбедносна заштита со поставување противпожарни аларми, детектори за чад, хидранти со црева долги по 50 метри, а има и повеќе излези на сите страни од објектот во случај на потреба.

Дворот е сѐ уште државно земјиште во процес на приватизација, па затоа од Град Скопје ќе бараат дозвола за поставување урбана опрема, како што тоа го прават рестораните кои немаат тераса на приватно земјиште.

Кога ќе се заврши објектот ќе плаќаме кирија по реални пазарни услови. Ова го нагласувам од причина што се прават „шеми“ во градот, на некои им се даваат огромни објекти за смешни пари во четири очи. Не е таков нашиот случај, ние плаќаме сериозни пари на приватник – објаснува Вељан, но на прашањето кога објектот ќе биде отворен за гости вели дека не може да каже конкретен датум, затоа што повеќе од еден месец чекаат одобрение од Град Скопје, за ЕВН да им приклучи струја.

Старите бараки беа опожарени во 2017 година и оттогаш до неодамна местото беше оставено запуштено и руинирано. И покрај тоа, обновата и уредувањето на просторот ги разгневи карпошани, кои стравуваат од нелегална изградба и кои бараат објаснување како се дозволило тука да има ресторан.

Од Општина Карпош посочија дека тие не издаваат дозвола за дејност, но дека не е издадена ниту градежна дозвола затоа што станува збор за обнова на објектот, за што не е потребно одобрение за градба.

Општина Карпош нема дадено одобрение за градба, туку до општината е поднесено техничко решение, согласно член 77 став 1 и став 2 и член 78 од Законот за градење, кои законски му овозможуваат на сопственикот да врши обновување на објектот (кој претходно беше опожарен) и враќање во првобитна состојба врз основа на проект за обновување – велат од Карпош и додаваат дека во поднесената документација е наведено дека се обновува деловниот простор како што било и претходно.

Обновени бараките што изгореа на „Партизанска“: Наместо научна дејност ќе се служат бургери и пијалаци

Во став 1 од член 78 од Законот за градење, на кој, меѓу другото, се повикуваат од Општината е прецизирано дека „Проектот за обновување на објектот или на дел од објектот, содржи техничко решение и опис за начинот на обновување на објектот или негов дел, прикажано како постојна состојба и обновена состојба, со што нема да се влијае на стабилноста на земјиштето или на исполнување на основните барања на соседните објекти, како и транспортот и згрижувањето на градежниот отпад што се отстранува и уредувањето на градежна парцела“.

Oд Министерството за економија веќе десетина дена нема одговор дали дозволиле отворање ресторан на овој простор.