Нашата позната пејачка Росана Сариќ – Тодоровска повторно застана на сцената и ја отпеа легендарната „Едно срце имам“, но овој пат со нов аранжман и секако вокална придружба. Вчеравечер во еден познат скопски локал нашиот познат актер Драган Спасов – Дац и композиторот и продуцент Александар Митевски и секако Росана пред присутните гости ја испеаа песната со која популарното дуо Маријана и Росана настапи на Фолк Фест Валандово 1988 година.

Со овој настап беше промовиран и видео спот за истата песна кој Росана го посвети на својот зет и автор на најголемите хитови на музикото дуо, Тоде Новачевски чиј живот зграсна на 66 годишна возраст потешко и долго боледување од рак на белите дробови.

За време на 80-тите години од минатиот век, Маријана и Росана Сариќ како сестри близначки беа автентична појава на македонската музичка сцена, но песните кои им ги напиша Тоде Новачевски од нив направија вистински музички икони. Секако, од оваа убава соработка се роди и љубовта меѓу Маријана и Тоде, кои долги години беа во брак.

Откако Маријана и Тоде се преселија во Австралија, Росана ја продолжи кариерата како пејачка на народна музика. „Свири ми брате Цигане“, еден од најголеми хитови на Росана ѝ го напиша токму Новачевски.

По долгата музичка пауза Росана во придружба на Дац и Александар уште еднаш докажа дека хитовите на сестрите Сариќ се незаборовни и вечни.