ВИДЕО | Српски избор за Евровизија: Констракта излезе на сцена и месеше леб во сад кој го користела баба ѝ
Вчеравечер се одржа и второто полуфинале на српскиот избор за евровизиски претставник, „Песна за Евровизија“. Изборната комисија на РТС избра вкупно 28 композиции – вчера слушнавме 14 песни, а исто слушнавме и за време на првото полуфинале, кое се одржа во вторникот (27 февруари). Најдобрите осум од двете полуфиналиња се пласираа во големото финале, закажано за 2 март.
Препорачано
Финалисти од второто полуфинале се Ива Лоренс („Дом“), Констракта („Ново, боље“), Душан Куртиќ („За тебе живим“), Зејна („Најбоља“), Теја Дора („Рамонда“), Милан Бујаковиќ („Моје“), Немања Радошевиќ („Јутра без тебе“) и Џорџи („Луна парк“).
Да потсетиме, финалисти од првото полуфинале се Христина („Бедем“), Лена Ковачевиќ („Зови ме Лена“), М.ира („Перцепција“), Бојана и Давид („No No No“), Бресквица („Гнездо орлово“), Марко Мандиќ („Дно“), „Кени није мртав“ („Дијаманти“) и Зорја („Лик у огледалу“).
Констракта – нова и подобра?
Пејачката Ана Ѓуриќ – Констракта, која со песната „In Corpore Sano“ се пласираше на високото 5. место на Евровизија во 2022 година, сега повторно се обидува да ја претставува Србија со песната „Ново, боље“.
Таа настапи во долга бела креација (слична на онаа што ја носеше во 2022 година), а на нозете имаше бели патики.
Верна на својот уникатен сценски стил, Констракта седеше на столче и месеше леб во сад кој го користела нејзината баба од српското село Глибовац, која доживеала 103 години. Ова е нешто што самата пејачка го откри за медиумите.
Не се гледа на евровизиската сцена повторно
Иако музиката што ја прави веќе ѝ се допадна на европската публика, таа смета дека нема големи шанси и годинава да настапи на големата евровизиска сцена.
„Јас не сум некоја пејачка и свесна сум за тоа. Тоа не се раскошни мелодии, раскажувам некоја приказна и се обидувам тоа да биде веродостојно. Во таа смисла, јас сум сигурна и многу ми е јасно што правам. На Евровизија се појавуваат сериозни музичари, кои имаат истакнат вокален талент. И самата знам дека не припаѓам таму. Има автори кои работат на сличен начин како и јас, но се обидувам да не се споредувам со другите – незгодно ми е“, изјави Констракта неодамна.
ВИДЕО | Констракта откри за кого гласаше на Евровизија: Лорин го направи натпреварот нефер
