Во пакетот на антикризни мерки има 492 милиони евра за стопанството, но безмалку 250 милиони евра се разни видови на кредити со поволни услови. Потпретседателот на Сојузот на стопанските комори, Орце Симов, ги оценува антикризните мерки како добро, но краткорочно решение. Тој потенцира дека за економски раст на државата и за развој на компаниите, неопходни се долгорочни решенија.

– За да обезбедиме поголеми плати, за да обезбедиме поголема благосостојба, за да има поголеми пензии, за да може државата да функционира, ни треба поголем раст. Но, со сегашниот модел нема да го постигнеме тоа, туку ќе имаме слчен раст како и изминатите години, од 2-3 проценти. Неодамна Европската комисија излезе со едно нивно видување дека ние за 10 години треба да го дуплираме бруто домашниот производ. За да го направиме тоа, ни треба секоја година во просек економски раст од 7 проценти – вели Симов.

Тој вели дека ваков раст може да се постигне со повеќе суштински мерки кои ќе овозможат економски систем каде компаниите ќе можат да бидат попродуктивни и каде што ќе може да генерираат поголема додадена вредност.

– Кредит некоја фирма може да земе, или да не земе. Со кредитот можеби ќе и биде овозможено да преживее. Но, времето ќе помине, парите ќе се потрошат и што потоа? Има една кинеска поговорка: Ако сакате некого да нахраните за еден ден дајте му риба, ако сакате да биде нахранет цел живот, научете го да лови риба. Ние треба да имаме такви мерки кои ќе овозможат компаниите да работат без помош. Затоа треба мерки во повеќе сфери. Пред се, подобрување на образованието, затоа што сегашното образование ги произведува идните економисти, правници, лекари…- вели Симов.

Во однос на овозможеното субвенционирање на придонеси за компаниите кои ќе зголемат платите од 3.000 до 9.000 денари, Симов вели „мерката е добра, но не е доволно добра“.

– Јас повеќе ги сакам суштинските мерки, затоа што тоа што е систематско и долгорочно, тоа е вистинското решение, иако не дава веднаш резултат. Ние мора да најдеме начин да ги зголемиме платите. Но, со субвенционирањето на придонесите, прашањето е што кога мерката ќе заврши, дали би дошле во ситуација компаниите да ги вратат назад помалите плати. Ние сме во состојба кога се намалуваат приходите, а се зголемуваат трошоците на компаниите. Тоа се случува и поради намалување на населението – вели Симов и потенцира дека демографијата е голем проблем и за економијата.

– Се намалува базата на купувачи и корисници и за банки и за мобилна телефонија и за храна и за облека…-вели Симов.

За неговите очекувања за 2024 година и за можностите за дигитализација на државата и компаниите, погледајте го целото ВИДЕО ИНТЕРВЈУ во продолжение: