Истра во Хрватска во понеделник околу 19 часот ја зафати силно невреме. Како што пишуваат хрватските медиуми, најмногу се погодени Истра, Ровињ и Пула.

Морето „подиве“, улиците се поплавени, а ветрот почна да носи сè пред себе, соборувајќи дрвја кои паднаа во камповите Портон Бионди и Амари, при што беа повредени неколку лица. Има и материјална штета, пренесува хрватски Индекс.

Ситуацијата во Ровињ е особено ризична, велат надлежните, поради што на населението му е кажано да остане во дома или во затворен простор.

Имаме повредени лица, но во овој момент сè уште не го знаеме бројот. Ситуацијата е таква што морам да кажам дека има голема штета. Сите достапни служби се на терен, од општинска дренажа, цивилна заштита, пожарникари… а веројатно ќе побараме помош и од други служби надвор од Ровињ. Штетата е огромна. Јас сум градоначалник само околу петнаесет дена, но слични ситуации имало во Ровињ и претходно, па дури и полоши од оваа. Но, оваа бура беше навистина доста силна – рече градоначалникот на Ровињ, Емил Нимчевиќ.