Српскиот претседател Александар Вучиќ доцна попладнето се сретна со Владимир Путин, а на почетокот, рускиот претседател рече дека „високо го цени“ доаѓањето на Вучиќ и српската делегација во Москва, „и покрај притисоците“.

„Почитуван господине претседателе, драг пријателе, дозволете ми срдечно да ве поздравам во Москва. Искрено цениме што сте со нас на овој значаен ден и што лично учествувате во празничните настани“, му рече Путин на Вучиќ.

Тие накратко се сретнаа вчера во Кремљ на приемот на светските претставници кои отпатуваа во Москва за да присуствуваат на прославата на Денот на победата.

Вучиќ претходно денеска присуствуваше на традиционалната воена парада на Црвениот плоштад, организирана по повод Денот на победата во Втората светска војна, а на која присуствуваа повеќе од 11.500 војници на руското Министерство за одбрана и други безбедносни структури, како и возила од други земји, учесници во војната.

Патувањето на Вучиќ на Москва, кое не беше без проблеми, доаѓа откако тој минатата недела итно ја прекина посетата на Соединетите Американски Држави, од каде се врати поради здравствени проблеми и беше примен во болница, а на активностите им се врати по неколку дена. Европската унија претходно го повика српскиот претседател да не оди во Москва поради руската агресија врз Украина, а од Брисел најавија дека потегот ќе има последици врз европските аспирации на Србија.