Фудбалерите на ПСЖ и Ботафого се пласираа во осминафиналето на Светското клупско првенство од групата Б, додека Атлетико Мадрид и Сиетл го завршија учеството на ова натпреварување.

Атлетико го победи Ботафого со 1:0 во последниот натпревар од третото коло, додека ПСЖ го победи Сиетл со 2:0, па гол-разликата беше одлучувачки фактор за пласман во следната фаза, бидејќи Парижаните, Бразилците и Атлетико имаа ист учинок – две победи и еден пораз. На крајот, Парижаните го освоија првото место на табелата, тимот од Рио де Жанеиро заврши на второто место, додека тимот од Мадрид, и покрај триумфот во последното коло над директниот ривал, го освои третото место, пред Сиетл саундерс.

На тимот на Диего Симеоне му беше потребна победа од три голови разлика, но играа неубедливо, особено во првото полувреме, а Алварез ја имаше единствената вистинска шанса во судиското продолжение. Веќе на полувремето, Симеоне го внесе Гризман во игра, а во првите 15 минути од второто полувреме, тој и Родриго де Пол имаа одлични шанси.

Во последните моменти од натпреварот, мадридскиот тим се отвори целосно, а Ботафого можеше да поведе по шансите на Игор Жесус, Грегоре и Монтор, но во 87 минута, Гризман ја погоди мрежата на бразилскиот тим и му донесе победа на Атлетико.

ПСЖ рутински дојде до триумфот над Сиетл, а овогодинешниот победник на Лигата на шампионите поведе преку Кварацхелија кој случајно ја промени траекторијата на топката по шутот на Витиња во 35 минута. Ашраф Хакими ја обезбеди победата за Парижаните во 67 минута, по одличен контранапад и додавање од Бредли Баркола. Во осминафиналето, ПСЖ и Ботафого ќе играат против двата најдобри тима од групата А, во која се Палмеирас, Интер Мајами, Порто и Ал Ахли.