Американскиот рапер Шон Комбс, познат како Диди, беше омилен меѓу познатите личности – пејачи, актери, инфлуенсери, па дури и членови на кралските семејства. Во текот на својата долгогодишна кариера, тој стана познат и по забавите кои ги организираше, а на кои присуствуваше само елитата. Сега, откако го уапсија и обвинија за трговија со луѓе, сексуална експлоатација, криминални дела поврзани со проституција и рекетирање, Диди полека ќе почне да ги губи своите познати пријатели…

Раперот, заедно со другите обвиненија, беше обвинет и за организирање т.н. „Freak Offs“ забави, каде што ги дрогирал своите наводни жртви, ги терал на сексуални односи кои траеле со денови, по што жртвите си заминувале дома со повреди. Раперот се изјасни за невин по сите обвиненија.

Моментално е во затвор, а неговите познати колеги би можеле да бидат во неволја. Неименуван полицаец изјавил за „Њујорк пост“ дека сите што присуствувале и учествувале во неговите „секс-забави“ биле прикажани на видеата што раперот ги снимил.

„Вие сте снимени од секој можен агол, вклучително и агли за кои не сте ни знаеле дека постојат“, рече тој.

Иако се уште не се знае кој би можел да се најде на списокот на познати личности кои учествувале на овие забави, се знае кој се забавувал со него низ годините.

Со години, Диди имаше добри односи со Џастин Бибер, чие пријателство започна уште кога пејачот имаше само 15 години и беше откриен како млада музичка надеж од страна на Ашер и Скутер Браун. По апсењето на раперот, на социјалните мрежи се прошири видео од 15-годишниот Бибер и Диди, кое многумина го опишаа како „морничаво“. Во него, раперот зборува за тоа дека поминал 48 часа со пејачот.

„Тој ќе помине 48 часа со мене, во кои ќе се дружиме. Не можам да ви откријам што сме правеле, но тоа секако ќе биде исполнуање на сон на секое 15-годишно момче“, изјави Диди во видеото.

Исто така, Диди додаде дека „добил старателство“ над Бибер.

„Тој потпиша со Ашер, а јас имам законско старателство над Ашер откако го направи својот прв албум. Немам законско старателство над Бибер, но тој е со мене во следните 48 часа и ќе полудиме целосно“, сподели тој.

Иако често доаѓал на забавите на Диди, според извори блиски на пејачот, Бибер не знаел што всушност се случувало на тие забави. Извор за „Дејли мејл“ изјави дека пејачот бил многу изненаден од наводите и дека се обидува да ги разбере, особено поради тоа што соработуваше со Диди пред нешто помалку од една година. Изворот додал дека Бибер е толку вознемирен од оваа вест што не може ни да разговара за тоа, а наводно целосно се изолирал. Според изворот, Бибер се кае што работел со Диди и дека никогаш не би го направил тоа колку знаел што се случува.

На списокот со редовните посетители на забавите е и Ашер, кој и самиот претходно призна дека бил сведок на прилично „луди работи“ кога живеел со Диди, кога имал 14 години. Во „Ховард Стерн шоу“, во 2016 година, тој раскажа како било да се живее со Диди во 1994 година. Тој рече дека идејата да живее со раперот била на Диди, затоа што сакал Ашер „да го види неговиот начин на живот“.

Потоа водителот го прашал дали домот на Диди е често „полн со жени и оргии“, на што Ашер одговорил: „Не баш. Имав можност да видам некои работи… Тоа беше прилично лудо. Се случуваа интересни работи, кои јас не мора да ги разбирам“.

Џенифер Лопез има голема поврзаност со Диди, со кого беше во љубовна врска од 1999 до 2001 година. Еднаш откри дека Диди бил првиот маж кој ја изневерил, а откри и дека му раскинала бидејќи чувствувала дека тој не сака семејство.

„Тоа беше првпат некој да ме изневери. Многу плачев и бев ‘луда’ додека бев во врска со него. Никогаш не го фатив, но знаев“, рече таа еднаш.

За време на нивната турбулентна врска, и двајцата беа уапсени во декември 1999 година. Сè се случило по пукање во клуб, а двајцата беа осудени за поседување оружје. Обвиненијата против неа набрзо беа отфрлени бидејќи таа тврдеше дека нема вмешаност.

На забавите присуствуваа и сестрите Ким и Клои Кардашијан и Кајли Џенер. Тие беа присутни и на раскошната прослава на неговиот 50. роденден во неговата палата во Холмби Хилс, во која беше извршена рација претходно оваа година. Истата вечер, во куќата имаше околу 600 гости, меѓу кои Џеј Зи, Снуп Дог, Парис Хилтон, Коби Брајант, Леонардо ди Каприо, Канје Вест, Мери Џеј Блајџ и други.

На роденденската прослава присуствуваше и манекенката Наоми Кемпбел, која со години е многу блиска со раперот. Тие двајца често се појавуваа заедно на разни настани, а извесен период се шпекулираше дека се во врска. Колку се блиски говори и фактот што Кемпбел пред две години помогна да се организираат родендените на неговите ќерки близначки. Минатата година Кемпбел го прослави и 54. роденден на раперот, а фотографиите од прославата подоцна беа избришани од социјалните мрежи.

Пред речиси 20 години, Диди ги запозна принцовите Вилијам и Хари, кои исто така биле на една од неговите забави. Освен со нив, тој се дружеше и со Вил Смит, диџеј Калид и многу други.

Една од познатите личности кои се поврзуваат со Диди е и актерот Ештон Качер. Во 2019 година, во видео за „Hot Ones“, тој низ смеа зборуваше за деталите за тоа што се случувало на забавите на Диди, а сега многу корисници на социјалните мрежи го критикуваат и го нарекуваат со погрдни зборови, барајќи од него да проговори на оваа тема.

Во видеото, Качер признава дека на забавите на Диди се случувало многу, но не сподели детали. За момент, делува дека е во искушение да открие нешто повеќе за злогласните забави на Диди, но застана кратко, велејќи: „Ни тоа не можам да го кажам…“.

Сепак, тој призна дека забавите на раперот биле „чудни“, иако не прецизираше на кои и на колку присуствувал.

Качер раскажа и како започнало неговото пријателство со Диди, потсетувајќи дека првпат се запознале во 2003 година, кога тој сè уште бил водител на емисијата „Punk’d“ на Ем-ти-ви.

Подемот и падот на Шон Комбс: Одбиена кауцијата од 50 милиони долари, останува во притвор, а му се заканува доживотна робија