По дводневна битка со огнената стихија, пожарот во Пехчево конечно е ставен под контрола.  На фејсбук групата „Струмички пожарникари“, е објавено видео на кое се гледа какви последици направи пожарот.

„Вака изгледа пеколот на земјата, пеколот над Македонија и Пехчево.  Уништени се стотици хектари квалитетна борова шума, едни од најубавите места во Македонија.  Пожарот е ставен под контрола, стотици пожарникари-спасители, припадници на Тигрите, ЕБР, АРМ, доброволци…. учествуваа во гаснењето на огнената стихија. Благодарност до сите граѓани кои не подржуваат во овие тешки денови“, напишаа од ТППЕ Струмица.

Утрово ЦУК информира дека изминатото деноноќие биле евидентирани 28 пожари, од кои 10 се сè уште активни.