Во Македонија во попладневните часови избија повеќе пожари на различни локации, предизвикувајќи сериозна загриженост и брзи интервенции од страна на противпожарните служби и други институции, информира заменик директорот на „Национални шуми“, Кире Михаилов.

„Дефинитивно во Македонија има многу граѓани кои не и мислат добро, друго објаснување за ова кое се случува јас немам!“, напиша тој на социјалната мрежа.

Пожарот кој избувна над селото Ваксинце во општина Липково, се шири кон Стража многу брзо поради силниот ветер. На местото на настанот се присутни две екипи од ЈП „Македонски Шуми“ Куманово и ТППЕ Куманово.

По целосното стабилизирање на пожарот кај Долнени во текот на претпладневните часови, во попладневните се пријавени неколку нови пожари. Нов пожар изби и во близина на село Богомила, општина Велес, каде веднаш беа упатени сили на ЈП „Македонски шуми“, полицијата и месното население, а за помош беше ангажиран и хеликоптер од воздух.

Како што соопшти Михаилов, во 14 часот, истовремено избувнаа два пожари — еден кај село Милетино во општина Брвеница, кој беше брзо локализиран со координација од копнени екипи, и друг во близина на село Церово во општина Желино. За гасење на пожарот во Желино, во тешко пристапниот терен, делуваат копнени сили од противпожарните единици и ЈП „Македонски шуми“, како и двата „ер“ трактори“ на Дирекцијата за заштита и спасување (ДЗС).

„Нашите копнени сили кои сеуште се наоѓаат високо на пожарот во Долнени над селото Стровија попладнево ни пријавија појава на дури четири нови чадења или нови пожари кој во моментов службите ги проверуваат и пристапуваат на гасење на истите!“, соопшти Михаилов.

ЦУК со два „ер трактори“ го гаси пожарот во Желино