Над 1.000 луѓе страдаат од респираторни проблеми по песочната бура што го погоди Централен и Јужен Ирак, соопштија ирачките здравствените власти.

Официјален претставник во провинцијата Мутана изјави за француската новинска агенција (АФП) дека се регистрирани најмалку 700 инциденти класифицирани како „гушење“.

Видеата што кружат на интернет покажуваат области покриени со густа портокалова магла, додека локалните медиуми известуваат за прекин на струја и прекин на летовите во неколку области.

Пешаците и полицајците носеа заштитни маски за лице за да се заштитат од прашината, додека спасувачите беа на лице место за да им пружат помош на оние кои тешко дишат, јави Би-би-си.

Повеќе од 250 луѓе беа префрлени во болниците во провинцијата Наџаф, додека најмалку 322 пациенти, вклучително и деца, мораа да бидат префрлени во болниците во провинцијата Диванија.

Други 530 случаи на респираторен дистрес беа регистрирани во провинциите Ди Кар и Басра.

Песочната бура ги покри јужните провинции на Ирак со портокалова магла, намалувајќи ја видливоста на помалку од еден километар. Властите беа принудени да ја прекинат работата на аеродромите во провинциите Наџаф и Басра.

Според локалните метеоролошки служби, се очекува постепено подобрување на условите до вторник наутро.

Ирак е на листата на Обединетите нации како една од петте земји најранливи на климатските промени, бидејќи редовно е погоден од песочни бури, екстремни температури и недостиг на вода.

Забележано е дека силната песочна бура во 2022 година предизвикала смрт на едно лице, додека над 5.000 лица побарале медицинска помош поради респираторни проблеми.

Ирачкото Министерство за животна средина предупредува дека земјата ќе доживее повеќе „денови со прашина“ во иднина.