Македонскиот пејач Огнен Здравковски го претстави своето ново музичко парче „Пекол и рај“, љубовна песна потпишана од неговите колеги и врвни музичари – Александар Тарабунов (музика), Зоран Стојановски (текст) и Димитар Андоновски (аранжман).

„Нешто ново од мене, сработено со многу љубов и посебна енергија. Слушнете ја песната, гледајте го спотот, почувствувајте ја приказната и дозволете да ве освои. Вашите мислења и коментари ми се најбитни и ме инспирираат за песните што следуваат. Погледнете, слушајте, споделете и коментирајте како ви се допаѓа! Уживајте и ширете љувов!“, е пораката што Огнен Здравковски ја напиша под новото парче музика кое реши да ѝ го претстави на јавноста, а кое значи почеток на едно ново поглавје во неговата музичка кариера.

За приказната да биде комплетна придонесува и видеото снимено со продукцијата Sneak Media. Кадрите се снимени во Белград под режисерската палка на Никола Суњевиќ, а во нив освен Оги се појавува и Јања Станојевиќ.

„’Пекол и рај’ е песна која стилски е многу поразлична од сето она што го имам снимено досега. Со Тара, Диме и Зонде се дружиме приватно, се разбираме, се познаваме и тие ми направија песна каква што одамна посакував. Ги слушнаа моите желби и добив парче какво што одамна посакував, парче во кое верувам и парче кое значи еден нов многу поразличен и позрел Огнен“, вели Здравковски и открива дека периодот што следува за него ќе значи многу работа затоа што веќе некое време интензивно работи на нов материјал.

Планот, како што појаснува, е на јавноста песните да ѝ ги претставува една по една, па годината што е пред нас да ја заокружи со еден убав проект.