Од 10 јавни чешмички кои се во надлежност на Општина Центар, работат само три од кои две се „прикрпени“, велат од граѓанската иницијатива „Шанса за Центар“, истакнувајќи дека Општината што сакаше да тргува со струја, не може да среди 10 чешми.

Шест се суви. Една тече под асфалт. Три „работат“, од кои 2 прикрпени и со верба. Десетата не ја најдовме. Од „Водовод и канализација“ ставиле водомери и општината треба да ги одржува и да ја плаќа водата. На 40 степени, 6 од нив се барут суви. Една тече од погрешно место, наместо да пијат луѓето, пие асфалтот – велат од „Шанса за Центар“.

Од трите што работат, две се лоцирани во Капиштец, но како што тврдат од Иницијативата, со прикрпена опрема, но барем човек може да се напие вода и да се освежи во жешките денови.

Водењето сметка за урбаната опрема е основна должност на општините, но во Центар уште нема екипа за нејзино одржување, тврдат од „Шанса за Центар“.

Оттаму објавија и видео на кое се гледа состојбата на секоја од чешмите.