Јанко Пенафорт е професионален музичар и пејач од Богота, Колумбија, кој е фасциниран од македонската музика. Откако го научил нашиот јазик, на својата фејсбук-страница „Колумбиец пее на македонски“ постојано објавува видеа како пее песни кои се дел од македонскиот фолклор.

Трогнат од трагедијата која овој викенд се случи во Кочани во кој 59 млади лица го изгубија животот, Јанко одлучи да се обрати до сите Македонци со емотивна порака.

Заедно со членовите од својот бенд, држејќи цвеќиња во рацете, пораката за поддршка ја испрати на чист, македонски јазик.

„Наши сакани Македонци, нашиот музички бенд од Колумбија и Венецуела длабоко жали за трагедијата која се случи во Кочани. Сакаме да знаете дека ние сме со вас. И народите на Колумбија, Венецуела и Украина од каде што е мојата мајка, сме со вас“, вели Јанко во видеото.

Патем, овој музичар неодамна ја посетил Македонија кога и објави фотографија на која позира на Камениот мост во Скопје.

ВИДЕО | Колумбиец ја пее „Јовано Јованке“ во Канада: „Македонци, вашата музика е вистинско богатство!“