„Ultimate Cruise“ на Royal Caribbean е најдолгото крстарење од ваков вид во светот. Трае неверојатни 274 дена – што е девет месеци – и вклучува турнеја во дури 60 земји. Бродот го започна своето прво патување во декември минатата година, а го заврши во септември.

Покрај посетата на 60 земји, патниците за време на оваа океанска авантура ги посетуваат и некои од најимпресивните глетки во светот.

Авантурата започнува и завршува во Мајами, Флорида, посетувајќи ги сите седум континенти, 60 земји, повеќе од 150 пристаништа и 11 светски чуда.

Сепак, ова патување кое се случува еднаш во животот сигурно не е евтино. Цените се движат од 53.999 долари по лице за внатрешна кабина до 105.839 долари по лице за јуниор апартман.

Еден од условите за плаќање на оваа огромна сума е таа да не се враќа.

Првата етапа од крстарењето ги опфати Јужна Америка и Антарктикот, пред бродот да го заокружи Кејп Хорн и да отплови до дестинации во Централна Америка, мексиканската ривиера, западниот брег на САД, Австралија и Јужниот Пацифик.

Маршрутата вклучуваше и пристаништа во Југоисточна Азија, Далечниот Исток, Индискиот Океан и Африка. Најзначајно, бродот ги посети Сејшели, Мадагаскар, Јужна Африка, Намибија, Ангола, Гана и многу повеќе.

Еден пар, Џо Мартучи и неговата сопруга Одри, рекоа дека уживале во искуството, но тоа траело предолго. Зборувајќи за Телеграф по завршувањето на крстарењето, парот открил дека на ова патување потрошиле неверојатни 200.000 долари, пишува „Експрес“.

На прашањето дали ќе го повторат искуството, Џо рече:

„Не можете да повторите авантура што се случува еднаш во животот двапати – а девет месеци на брод се премногу долги. Четири до пет месеци се сосема доволни“.