Распука новиот асфалт од булеварскиот влез на Битола, само неколку денови откако беше соопштено дека работите се во финална фаза и дека Битола добива нов булеварски влез, јавува телевизијата „Тера“.

Делови од новиот асфалт на тротоарот во населбата Горно Оризари значително се подигнале над предвиденото ниво. На некои места земјата пропаднала и се направиле дупки веднаш до тротоарот. Местото каде се настаните оштетувањата денеска е оградено со зелени заштитни платна.
Во овој реон општината работи на проект за реконструкција на коловозот во должина од 1,3 километри. Активностите се дел од изградбата на булеварски влез во градот широк 27,5 метри.

Од општината велат дека причината за подигнатиот асфалт е дождот.

„Во текот на вчерашниот ден, по обилните врнежи од дожд, настана оштетување на тротоарот на дел од булеварскиот влез од страната на Прилеп, од десната насока. Тротоарскиот дел сè уште е во фаза на изведба“, соопштија од општината.

Стручни екипи проверуваат како настанала штетата.