Вчера на 66-годишна возраст нѐ напушти композиторот Тоде Новачевски, човекот чии композиции и ден-денес важат за едни од најубавите македонски песни некогаш направени.

За време на 80-тите години од минатиот век, Маријана и Росана Сариќ како сестри близначки беа автентична појава на македонската музичка сцена, но песните кои им ги напиша Тоде Новачевски од нив направија вистински музички икони. Секако, од оваа убава соработка се роди и љубовта меѓу Маријана и Тоде, кои долги години беа во брак.

„Иако композициите ‘Ако не исчезнам’ и ‘Признавам’ се доста различни по мелос, по ритам и по карактер на звук, добро се сеќавам дека ги пишував оптоварен со една иста идеја и желба – содржината на текстот да ја доближам до своите искрени чувства, но да пробам да го направам тоа со најмелозвучни зборови од нашиот јазик. Затоа, неслучајно и во двете песни, скоро ниеден збор не завршува на тврда согласка. Ваквата моја опсесија во тој период беше резултат на комплексот што како љубител на поп и фолк музиката и како млад автор го имав заради доминацијата на неколку други јазици на нашите простори во тоа време, кога добар дел од тогашните генерации живеевме во заблуда дека нашиот македонски јазик не звучи толку убаво како српскиот, англискиот, италијанскиот и многу други јазици. Инаку, најубави комплименти и за двете песни, поготово за ‘Признавам’, добив уште пред нивната прва изведба на ‘Макфест’, од тогашниот уметнички директор Славе Димитров, без кој изведбата на мојата музика и аранжман не би била таква каква што е. Успесите на „Макфест“, на ‘Поп хит на годината’ со ‘Признавам’ и на ‘Хит на деценијата’ ги потврдија неговите убави зборови“, раскажа Новачевски за „Свет Австралија“.

Во истиот период, поточно во 1987 година, тој ја напиша и ја изведе насловната нумера „Урде чавен“ за култната телевизиска серија „Трст виа Скопје“.

Тоа што, можеби, не многу луѓе го знаат е дека Новачевски ја има напишано и антологиската нумера „Од љубов не се бега“ на легендарниот Зафир Хаџиманов.

„‘Од љубов не се бега’ е и за мој поим и вкус еден од бисерите на ‘Валандово’, иако песната не влезе ни во финалето на фестивалот! Легендарниот, сега покоен Зафир, со кој ја снимивме оригиналната изведба на песната, го извести организаторот непосредно пред полуфиналната вечер дека има фрактура на нога и дека не може да допатува. Затоа песната ја испеав самиот, придружен од Маријана, која беше скриена зад сцената. Се испостави дека направив голема грешка. Не само заради невлегувањето во финале, туку најмногу заради искуството од самиот настап од кој извлеков поука дека песна со таков звук и ритам, без ниедна проба и без доволно јасен звук, не се пее така лесно. Дали мојата изведба беше причина за фестивалскиот неуспех на песната и ден-денес не знам, затоа што таа изведба никогаш не сум имал прилика да ја чујам“, сподели Тоде за „Свет Австралија“.

Откако Маријана и Тоде се преселија во Австралија, Росана ја продолжи кариерата како пејачка на народна музика. „Свири ми брате Цигане“, еден од најголеми хитови на Росана ѝ го напиша токму Новачевски.

„Песната со оригинален наслов ‘Свири ми брате Ферусе’ ја напишав на еден од последните заеднички настапи на Маријана и Росана, во кафеаната ‘Теке’ во Тетовско, на празникот Василица, на две недели пред заминувањето во Австралија. Ја напишав за 15-тина минути на салфетка, додека заедно со сестрите и неколку други интерпретатори, гости на програмата на таа вечер, седевме на маса наспроти маестро Ферус, кој везеше на неговиот саксофон. Моето чувство во тие моменти, заедно со малата содржина на текстот на ‘Свири ми брате Цигане’, останаа врежани во мојата меморија и срце засекогаш. Морам да признаам! Фактот дека Македонија беше навикната на дует на сестрите, со успехот на Росана на ‘Цветници’, а подоцна и на ‘Фолк хит’ на годината и на деценијата, и јас и Маријана бевме максимално изненадени“, се присети тој во разговорот за „Свет Австралија“.

Овие песни, но и уште многу други композиции, се вистинско музичко богатство со кое сите ние се гордееме. Тоде, ти благодариме за сѐ. Почивај во мир.

Маријана и Росана трогателно се простија од Тоде Новачевски: Рековме збогум…