Импозантниот мурал со ликот на доајенот на македонското глумиште, Мето Јовановски на бочната страна од Кинотеката на Македонија е дело на двајца млади и талентирани уметници Евгенија Трајковска и Драган Илиќ.

Двајца студенти на Ликовната Академија со задоволство го прифатија предизвикот да се наслика голем формат во чест на актерот и со недели работеа на секој детаљ од муралот, качени на високо скеле. Во креацијата се обидоа да вметнат дел од своето искуство стекнато при цртање на графити, како и наученото на студиите по сликарство.

-Во принцип кога станува збор за боја и четка ништо не е тешко, а скелето е дефинтивно нешто на што треба да се навикнам, искрена е Евгенија која работеше на ликот на Мето Јовановски.

Проектот е реализиран по иницијатива на Ротаракт Клуб Скопје Центар во соработка со Кинотеката, а целта е да се подигне свеста кај граѓаните за културата и уметноста, како и за разубавување на градот. На Кинотеката во претходните години, на истиот ѕид се насликани и мурал посветени на Блаже Конески и на рок иконата Фреди Меркјури.

Уметниците посакуваат уште многу мурали да го красат градот, зошто урбаната уметност е признаена и прифатена како уметнички израз на новото време и потребите и стремежите на младата генерација.

-Секоја куќа има своја градина која што човекот ја декорира и ако градот го гледаме како голема куќа со огромна градина, мислам дека може и тоа да биде декорирано на стилски начин, вели Евгенија.

-Има потреба да се разубави градот и со апстрактни работи, со работи за деца, за уметници, за музичари, така е многу поубав. А и за нас е добро, се запознаваме, се дружиме, вели Драган.

Целиот разговор со Евгенија и Драган за тоа како се создаде муралот посветен на Мето Јовановски но и за нивните размислувања за урбаната уметност и предизвиците како млади уметници во Македонија погледнете го во видеото:

Награда во чест на Мето

На денешната промоцијата на муралот беше востановена и наградата „Мето Јовановски“ за извонредно актерско достигнување во уметноста на филмот, а прв лауреат е македонскиот театарски, филмски и телевизиски актер Владо Јовановски.

Советот на Фестивалот на медитеранскиот и балканскиот филм „Преку езерото“ и Кинотека на Македонија, кои се организатори на настанот, ги презентира мотивите за овие две посебни меморијални дела направени во чест на еден од најголемите актерски имиња во земјава и во регионот, Мето Јовановски.

На муралот се впишаните зборовите на Мето кој ги користел како одговор на прашањето: како си? „Што да ти кажам. Од Бога добро“, имал обичај да возврати Јовановски кој остави неизбришлива трага во македонската филмска и театарска уметност. Ќе остане запаметен по главните улоги во филмовите на Столе Попов „Среќна Нова ’49“, „Тетовирање“, како и многу други филмски остварувања кои беа наградени и во странство како што е „Пред дождот“, „Засега без добар наслов“, „Нечиста крв“, „На пат за Катанга“, „Трето полувреме“…