Музичкиот магнат Шон „Диди“ Комбс го предупредил Џастин Бибер да не зборува за деталите од нивното дружење во текот на едно интервју, се наведува во новата објава на водителот Џими Кимел.

Раперот, попознат во јавноста како Пи Диди, кој во моментот се наоѓа во притвор, се појавил со тинејџерската ѕвезда Џастин Бибер во доцното вечерно шоу „Џими Кимел во живо!“ во 2011 година, кога тој имал само 16 години. Тогаш разговарале за нивната блиска врска, откривајќи му интересни детали на водителот Џими Кимел. Кимел бил збунет и се обидувал да извлече некоја информација од нив.

– Што ви е момчиња? Дали вие двајца работите заедно – ги прашал водителот во видеото кое повторно стана вирално на социјалните мрежи.

– Не. Се спријателивме на многу чуден начин…За многумина од нас тој е мојот помал брат. Тој не се плаши да ми се јави и да побара совет – изјавил Диди, инаку поранешен извршен директор на компанијата „Бед бојс рекордс“.

Пи Диди се осврнал на шоубизнисот и музичката индустрија, коментирајќи дека тоа е „силно семејство“ и дека сите, вклучително и тој, сакаат да го „заштитат“ Бибер бидејќи тој е „добра личност“.

– Покрај неговиот талент, тој е едно од најдобрите деца што некогаш сте ги запознале – додал раперот, а пренесува „Њуз“.

Бибер му се заблагодарил на Диди за прекрасните зборови и поддршката, додека нивниот разговор бил проследен со громогласен аплауз од публиката, а водителот Кимел му предложил на Диди да му купи автомобил на Џастин како што тоа направил за својот син.

– Ми даде ламборџини – само уште го немам – додал Бибер, додека Диди изнервиран го свртел погледот.

– Го имаше моето ламборџини ден-два. Тој исто така имаше и пристап до куќата – открил Диди, алудирајќи на нивното заедничко дружење кога поминале 48 часа заедно. Џастин Бибер тогаш тоа го објави на Јутјуб.

Во видеото насловено „48 часа со Диди“, објавено на каналот на Џастин на Јутјуб во 2009 година, раперот рекол дека „навистина не можат да откријат“ што ќе прават заедно.