Петмина полицајци од Конектикат се обвинети за малтретирање на притвореник, откако мажот останал делумно парализиран додека се возел во задниот дел на полициско комбе.

На 19 јуни, полицијата го возела Ренди Кокс (36) во полициската станица во Њу Хевен поради обвинение за нелегално поседување на оружје. Како што наведуваат американските медиуми, возачот наводно посилно стиснал на кочницата, по што Кокс ја удрил главата во металната преграда во комбето.

„Не можам да се движам. Ќе умрам вака. Те молам, те молам, помогни ми”, велел Кокс неколку минути по инцидентот.

Додека Кокс молел за помош, некои од полицајците го исмевале, му рекле дека е пијан и дека глуми болка. Полицајците потоа го извлекле Кокс од комбето за неговите нозе и го сместиле во ќелија пред да го однесат во болница.

„Мислам дека го скршив вратот“, рече Кокс откако излегол од комбето.

„Не, само имаш премногу испиено. Ајде, седни“, му рекол полицаецот.

Подоцна било утврдено дека Кокс го скршил вратот додека го возеле и останал делумно парализиран. Петмина полицајци од Њу Хевен по овој инцидент се обвинети за несовесно загрозување и суровост кон притвореник.

Иако секој полицаец бил обвинет за истите злосторства, некои од нив се чини дека посериозно ги сфатиле молбите на Кокс. Оскар Дијаз, кој го управувал комбето, застанал откако Кокс се пожалил на повредата, разговарал со него и побарал брза помош да ги пречека во притворот.

Адвокатот на семејството на Кокс, Бен Крамп, во понеделникот рече дека полицајците од Њу Хевен треба да преземат одговорност за своите постапки.