Францускиот пејач Ману Чао изненадно ја посети Македонија и помина едно попладне со пријатели во скопската населба Аеродром.

Тој сподели видео на своите социјални мрежи и напиша порака во која откри дека уживал во дружење и музицирање во една позната кафеана.

„Другари од Аеродром! Волшебно застанување во ‘Мезе бар’, Аеродром. Секогаш има огромна енергија кога ќе си ги видам сите пријатели таму! Ова е моето семејство со душа! Едвај ја чекам следната средба! Секогаш сум благодарен“, напиша пејачот и додаде дека „се гледаме наскоро“.

Посетата предизвика голем интерес кај неговите македонски обожаватели, а еден од нив на социјалните мрежи прокоментира: „Замисли да излезеш на кафе или на пијачка и таму да го видиш Ману Чао. Штета што не го погодив денот, па макар случајно“.

Ману Чао, познат по хитовите „Clandestino“ и „Me gustas tú“, важи за еден од најомилените уметници во регионот. Тој одржа неколку концерти во Скопје, а последен пат во 2022 година, во рамки на фестивалот „Таксират“.