Од 1-ви март нема да имаме замрзнати цени на основните прехранбени производи.

Најверојатно ќе се прибегне кон други механизми за да се спречи ценовен шок, како што е ограничување на маржата на трговците. Ова вчера го соопшти министерот за економија Крешник Бектеши кој посочи дека во следниве две недели се планираат средби со засегнатите страни на кои би требало да се испеглаат ставовите.

Но кога станува збор за лебот, тука особено ќе се кршат копјата со оглед дека изминативе два месеци мелничко-пекарската индустрија постојано апелираше дека трпи огромни загуби и дека состојбата со замрзнатите цени може да доведе до празнење на рафтовите за леб во продавниците.

За одлуката од 1-ви март да се тргне ограничувањето на цените на основните производи од следниот месец, во Утрински брифинг разговаравме со претседателот на Здружението на мелничко-пекарската индустрија при Стопанската комора на Македонија, Горан Малишиќ.

-Ние како индустрија се соочуваме со големи проблеми по зголемувањето на трошоците околу електричната енергија, со што одлуката за замрзнувањето на цените нанесе голема штета на индустријата, па очекуваме ако се прекине оваа одлука дека индустријата ќе изнајде некаков начин да ги избалансира цените за да немаме загуби и понатаму, вели Малишиќ.

Малишиќ вели дека очекуваат да видат какви одлуки ќе бидат донесени со контролирање на маржите и на кој дел од трговците ќе се однесуваат тие.

Проследете го целиот разговор во видеото