Нема Македонец што не ја знае, нема срце што не затреперува на првите звуци од „Македонско девојче“ – ама сега, оваа наша безвременска песна доби сосема нова димензија. Хорови од целиот свет ѝ дадоа нов живот, а видеото од нивните изведби ги освои сите!

 

View this post on Instagram

 

A post shared by macedoniangifts.com (@macedoniangifts)

Ансамбли од Јордан (Аман), САД (Јута и Конектикат), Естонија (Талин), Ерменија (Ереван), Турција (Истанбул) и Канада (Британска Колумбија) ја изведуваат песната со неверојатна емоција и почит. Секој хор со своја интерпретација, но сите како едно – ја пеат од срце, како вистински Македонци!

Изведбите се претежно снимени во концертни сали, дел од програми посветени на народната музика, каде „Македонско девојче“ се издвојува како апсолутен фаворит кај публиката. Звучи неверојатно кога 50-тина луѓе од различни култури, јазици и континенти заедно пеат за македонското девојче – како химна што не познава граници!

Видеото не остана незабележано ни од јавните личности, па Игор Џамбазов, еден од нашите најпознати актери и шоумени, со гордост го сподели на својот инстаграм-профил, со што уште еднаш ја потврди магијата на македонската песна.

Ова е уште еден доказ дека македонската музика е повеќе од уметност – таа е емоција што не познава јазик, ниту граници. А кога светот ја пее нашата песна, ние само можеме гордо да кажеме: ова е Македонија, а „Македонско девојче“ никогаш не звучело повеличествено!