Познатиот хрватски виолончелист Стјепан Хаусер ги воодушеви македонските обожаватели со својата виртуозна изведба на народната песна „Јовано, Јованке“. Со македонското знаме во позадина, тој ја отсвири оваа безвременска композиција како дел од својот нов светски музички проект „Музиката го обединува светот“.

Идејата зад овој проект е секој ден да објавува изведба на песна од различна држава, а потоа да види кои пет песни ќе добијат најмногу реакции и гледаност.

Хаусер ја започна кампањата со мексиканската „La Bamba“, по што следуваше „Zorba’s Dance“ од Грција. Своето внимание го посвети и на балканските простори, па ги отсвири и „Cesarica“ од Оливер Драгојевиќ за Хрватска, како и „Tamo Daleko“ за Србија.

Последниот избор беше токму „Јовано, Јованке“ за Македонија, што предизвика лавина позитивни реакции.