Вработен во Кралското здружение за заштита на животните од суровост од Велика Британија го поставил својот телефон за да сними спасување животно, но љубопитна лисица му го украла уредот и побегнала со него.

Бен Фицкоста пристигнал во шума близу англиското село Багшот поради дојава дека има лисица со повредена нога. Тој ја забележал лисицата и го поставил телефонот за да го сними видеото од фаќањето.

„Всушност, има две лисици во шумата. Некој ни се јави во здружението и ни пријави дека едната од нив е повредена. Го поставив телефонот, но додека се подготвував да ја фатам, таа притрча, го намириса телефонот и побегна со него“, изјавил Фицкоста.

На видеото се гледа како лисицата го спушта телефонот под блиската грмушка и го душка, а во тој процес успева да направи селфи. Фицкоста го фатил животното и успеал да си го врати телефонот.

„Не можам да поверувам дека тоа, всушност, се случи. Ми го разубави денот. Видеото е многу смешно. Драго ми е што си го добив својот телефон назад. Морав да трчам за да ја стигнам бидејќи знаев дека ќе ја фрли во некоја грмушка“, изјавил тој.

Потоа успеал да ја лоцира другата лисица.

„Ја најдов повредената лисица и успеав да ја спасам. Сега се лекува бидејќи има воспалена нога од стара повреда. Се надевам дека целосно ќе закрепне“, заклучил тој.