ПСЖ продолжи со лошите резултати од почетокот на годината.

Денес Галтие излезе на теренот против Монако без Мбапе, Меси и Верати и тоа Монако знаеше да го искористи. Одлично играше тимот од Кнежеството и веќе по 18 минути игра имаа предност од 2:0. Головин погоди по асистенција на Бен Једер, а потоа и Французинот се запиша во листата на стрелци.

Три минути по голот на Монако, ПСЖ преку Екитике имаше добра прилика, но Нубел добро реагираше. На спротивната со добри шанси возвратија Головин и Бен Сегир. Парижаните на пет минути пред крајот на полувреме преку Заире Емери намалија на 2:1.

Бен Једер со својот втор гол на натпреварот во второто полувреме ги постави конечните 3:1. Можеше францускиот напаѓач да дојде и до хет-трик, но Донарума одлично го одбрани неговиот удар пред истекот на еден час игра.

ПСЖ сега е во серија од два порази во низа, претходно Марсеј ги исфрли од Купот на Франција и сето тоа на неколку дена пред осминафиналниот натпревар против Баерн во ЛШ.