Косовскиот премиер Аљбин Курти денеска објави четириминутно видео во кое се наведени настаните поврзани со експлозијата на каналот Ибар-Лепенец на 29 ноември, повторувајќи дека се работи за терористички напад, додека директорот на Канцеларијата на Владата на Србија за Косово и Метохија, Петар Петковиќ, видеото го нарече „цртан филм“.

Курти на социјалната мрежа „Икс“ го објави видеото на кое е хронолошки претставен наводниот редослед на настаните по експлозијата со одредени тврдења. Тој вели дека над 20 килограми експлозив биле употребени во „кинетичкиот терористички напад на критичната инфраструктура на Косово минатиот петок“, за којшто Приштина ја обвинува Србија, а Белград негира каква било поврзаност.

„Минатата недела можеше да биде многу поинаква доколку не постоеше брз, координиран и професионален институционален одговор за ублажување на влијанието на штетите. Како напад врз цивилното население, тоа можеше да го намали производството на електрична енергија во земјата за 60 проценти и влијаеше на пристапот до вода до 40 отсто од населението“, пишува Курти во објавата.

Тој тврди дека во овој случај постои „алармантна сличност“ со руското гаѓање и уништување на критичната цивилна инфраструктура во Украина.

„Ова видео ги прикажува настаните и институционалниот одговор во првите 48 часа по нападот, кој се случи на 29 ноември. Иако е постигнат значителен напредок, напорите на институциите за целосно санирање на штетите и враќање на нормалноста сè уште се во тек“, додаде Курти. .

Директорот на Канцеларијата на Владата на Србија за Косово и Метохија, Петар Петковиќ, пак, изјави дека Курти „по фијаското на конференцијата минатата недела, решил да монтира цртан филм“, со оценка дека би било добро тој да одговори на „сериозните прашања од кои упорно бега“, пренесува „Нови магазин“.

Во изјавата, Петковиќ праша кој го наредил и како однапред знаел за нападот на каналот Ибар-Лепенец, но и како е можно само девет минути по нападот да „имал подготвено писмо до КФОР со барање да ги испрати т.н. КБС (Косовските безбедносни сили) на северот“.

Петковиќ побара одговор и каде се доказите за „лажните обвинувања што ги упати кон Србија во првите минути по нападот“, како и зошто Курти „по фијаското се обиде да ја забрани партијата Српска листа и да ја избрка од Парламентот“.

„Курти не одговара на сите овие прашања, но затоа прави анимирани филмови за да ја измами јавноста. Нема да успее, ние ќе инсистираме на одговори истрајно и упорно, затоа што Белград, за разлика од него, нема што да крие“, додаде Петковиќ.

Approximately 20kg of explosives were used in last Friday's kinetic terrorist attack on our critical infrastructure. This past week could have been very different had it not been for the swift, coordinated, and professional institutional response to mitigate the impact of the… pic.twitter.com/F6o9uEWceF

— Albin Kurti (@albinkurti) December 8, 2024