Последниве денови на Монт Еверест голем број алпинисти се бореа со сурови временски услови за да стигнат до врвот, додека сезоната на искачување се ближи кон крајот.

Алпинистите и нивните водичи – шерпаси се обидоа да се искачат на познатата планина во мај, борејќи се со тешки временски услови во обид да го освојат врвот висок 8.849 метри.

Поради ограничените периоди на убаво време во близина на врвот, голем број алпинисти се наредија врзани за единственото безбедносно јаже, во феномен познат како „сообраќаен метеж на Еверест“.

Како што забележува „Скај њуз“ , ситуацијата се влошила со појавата на многу алпинисти почетници.

„Општо земено, на Еверест, времето е клучен фактор и не беше како што беше предвидено. И второ, беше преполно бидејќи таму имаше и професионалци и почетници во исто време“, рече шерпасот Пасанг Ринџи, кој двапати се искачил на врвот.

Според него, само на одбрани или обучени алпинисти треба да им биде дозволено да се обидат да се искачат на врвот, за да биде искуството побезбедно и полесно за сите.

„Во моментов, има почетници без искуство или знаење и професионалци во исто време, и тоа го предизвикува проблемот“, рече тој.

„Планинарите мора да имаат основни познавања за правилно користење на опремата и да бидат безбедни додека се искачуваат на Еверест“, додаде тој.

Министерството за планинарење на Непал објави дека 468 странски алпинисти од 57 земји добиле дозволи за искачување на Еверест до крајот на мај, заедно со приближно ист број непалски планински водичи.