Кошаркарите на Кливленд брзо им се вратија на победите откако во минатото коло Бостон им ја прекина низата од 15 триумфи во низа од почетокот на сезоната.

Пред својата публика Кливленд беше подобар од Њу Орлеанс со 128:100. Гостите се соочува со сериозни проблеми со повредени кошаркари, па во таква ситуација не можеа да парираат на најдобриот тим во лигата.

Фантастично прво полувреме одигра Тај Џером кој во тој период уфрли седум тројки од десет шута и до паузата зад своето име имаше веќе 27 поени. Кливленд на полувремето водеше и со 14 поени разлика.

Предноста продолжи да расте и во второто, па така по три четвртини на семафорот разликата беше 32 поени. Во таква ситуација стратегот на Кливленд им даде одмор на најдобрите.

Џером за разлика од првото полувреме во второто постигна само два поени и средбата ја заврши со 29. Нијанг уфрли 20, додека најдобриот играч на Кливленд, Донован Мичел одигра само 20 минути и постигна десет поени. На спротивната страна во редовите на Њу Орлеанс се истакна Антонио Ривс со 29 постигнати поени.

РЕЗУЛТАТИ

Кливленд – Њу Орлеанс 128-100
Милвоки – Чикаго 122-106
Хјустон – Индијана 130-113
Мемфис – Филаделфија 117-111
Оклахома – Портланд 109-99
Голден Стејт – Атланта 120-97
Феникс – Њујорк 122-138
ЛА Клиперс – Орландо 104-93