Популарните руски јутубери, познати по шегите кои ги прават на познатите личности објавија ново видео, чија мета сега беше поранешниот американски државен секретар Хенри Кисинџер, кој на дуото му ги открил своите размислувања за саботажата на гасоводот „Северен тек“. Искусниот дипломат, кој бил државен секретар на САД во периодот од 1973 до 1977 година и поранешен советник за национална безбедност на САД, станал најновата личност што била измамена од двојката позната како Вован и Лексус, објавија руските медиуми.

Владимир Кузњецов и Алексеј Столјаров во нивната најнова измама се претставија пред Кисинџер како украинскиот претседател Володимир Зеленски. Кисинџер беше запрашан кој според него стои зад саботажата на гасоводот „Северен тек“ со кој се транспортира гас меѓу Русија и Германија.

„Искрено мислев дека вие Украинците го направивте тоа“, им рекол Кисинџер. Еден од нив потоа го прашал: „Навистина? Мислеше дека сме ние?! Не, не, не сме…”. Кисинџер потоа одговорил: „Но, јас не те обвинив“, сугерирајќи дека не мислел на забелешката да служи како критика.

Уште не се знае кој стои зад експлозијата на гасоводот „Северен тек“ за која Русија и Украина постојано си разменуваат обвинувања.