Минатото лето Тимо Вернер пристигна во Челси за 53 милиони евра од Лајпциг и тоа со епитет на еден од најдобрите напаѓачи во Европа. Навивачите на „сините“ сметаа дека Вернер ќе биде идеалниот наследник на Дидие Дрогба, веднаш го доби статусот на прв напаѓач на екипата и кај Френк Лампард, а остана стартер и кај Томас Тухел.
Тоа го заслужи со своето залагање на теренот, борбеноста, брзината, одлично втрчува во празен простор и е вешт со топката, а единствена мана му е таа за која е донесен во Челси – да дава голови.

Доколку не влегува во шанси тоа и не би било толку очигледно, но првиот напаѓач на Челси и на германската репрезентација сезонава стана предмет на потсмев на социјалните мрежи поради неговите промашувања на зицери и тоа во моменти кога е потешко да се промаши отколку да се затресе противничката мрежа.

Поради тоа, веќе има компилација од неговите големи промашувања, а меѓу нив е и промашувањето во квалификациите за СП 2022 година кога против Македонија кога од пет метри го утна целиот гол.