По паузата од 13 дена, Никола Јокиќ се врати на терените и тоа со фантастичен трипл-дабл од 31 поен, 17 скока и 10 асистенции во поразот на Денвер од Далас со 120:123.

Јокиќ отсуствуваше од терените од 10 ноември поради раѓањето на неговото второ дете и се врати за натпреварот со Далас. Сепак, балканската пресметка со Лука Дончиќ изостана затоа што словенечкиот кошаркар ја пропушти средбата поради повреда.

И без Дончиќ Далас изгледаше одлично на паркетот, а во еден момент имаше и предност од 23 поени во третата четвртина. Денвер направи пресврт и во последните три минути влезе со предност (113:108).

Завршницата од средбата донесе неизвесна борба и петти трипл-дабл за Јокиќ во низа со што стана само седми кошаркар во НБА со таков учинок. На теренот помина 39 минути.

Зад Јокиќ 17 поени уфрли Мајкл Портер Јуниор, додека на спротивната страна Наџи Маршал одигра одличен натпревар со 26 постигнати поени, Ирвинг додаде 19.

НБА РЕЗУЛТАТИ: Филаделфија – Бруклин 113:98, Вашингтон – Бостон 96:108, Њу Орлеанс – Голден Стејт 108:112, Чикаго – Атланта 136:122, Хјустон – Портланд 116:88, Милвоки – Индијана 129:117, Денвер – Далас 120:123, ЛА Клиперс – Њујорк 104:88.