Ланецот на продавници за видеоигри Гејмстоп, големите фондови од Вол Стрит, Вол Стрит Бетс на социјалната мрежа Редит и платформата за тргување акции Робинхуд. Овие во последните две недели се главните актери на големата драма на Вол Стрит, односно американскиот финансиски пазар, кои некои ја нарекуваат борбата на Давид против Голијат.

Малите инвеститори од Редит во таа борба им нанесоа големи финансиски загуби на таканаречените хеџ-фондови кои се мерат во милијарди долари, а самите добро заработија. Сепак, последните денови дојде до пресврт на ситуацијата во корист на големите играчи од Вол Стрит, а на штета на малите инвеститори и е неизвесно каков расплет ќе има и кој на крајот ќе излезе како губитник.

Вредноста на акциите на Гејмстоп почна после наглиот пораст, кој почна на 25 јануари, еднакво нагло да паѓа од 29 јануари до денеска. Откако во понеделникот драстично падна, во вторникот и средата успеа да се задржи на околу 90 долари, но во четврток продолжи да тоне, така што до затворање на берзата во четвртокот падна на само 53.5 долари.

Тоа и понатаму е далеку поблиску до вредноста која ја имаше на 25 јануари (77 долари), но далеку помалку отколку што изнесуваше на својот пик на 27 јануари (348 долари).

Овој нагол пад во последните неколку дена ја намали пазарната вредност на компанијата од 35 милијарди минатата недела на 6.3 милијарди долари. Според се, ова е повеќе последица од мерките воведени од платформите за тргување со акции на мало како Робинхуд, кој прво целосно забрани, а потоа после бесните реакции на јавноста, строго ги ограничи понатамошните купувања на акции на Гејмстоп, но и на некои други компании на кои не им оди добро, а кои инвеститорите од Редит почнале масовно да ги купуваат, како „AMC Theatres“, „BlackBerry“, „Nokia Corporation“ и други.

Многу финансиски експерти предупредија за овој исход, од моментот кога инвеститорите од Редит првпат се фокусираа на акциите на Гејмстоп.

Тие предупредија дека поединците кои не разбираат целосно во што влегуваат, може да страдаат на крајот, кога цената нагло ќе падне.

Форбс ја истакна итноста на овие предупредувања со извештајот наречен „Ве молиме продадете го GameStop пред да падне цената“.

И покрај предупредувањата и наглиот пад на цените, не секој е подготвен да се откаже.

Извор: Индекс.хр