Божиќните празници се едни од најрадосните за православните христијани кои го слават и одбележуваат Христовото раѓање. Почнувајќи со малите коледарчиња кои уште рано утрината на 5 јануари тропаат на вратите на домаќинките пеејќи бадникарски песни, па со сечење и внесување на бадниково гранче во домот, па сѐ до бадниковата вечера каде се собираат најблиските, верниците го одбележуваат Бадник. За обичаите и начинот на кој се празнува овој ден зборувавме со протојереј Зоран Стаменковиќ, кој вели дека обичаите се добри и треба да се чуваат, но во ниеден случај не треба да ги сметаме како суштина на Христовото раѓање.

– Обичаите се корисни имаат убавина и душа тогаш кога со нив ја доловуваме симболиката на празникот и пораката, која ја носи со себе. На Бадник посебно место во венецот на божиќните обичаи, му припаѓа на бадниковото дрво, со чие сечење и свечено внесување во домот почнува празнувањето на овој голем празник на мирот и љубовта. Ова младо дабово дрво е слика на самиот Христос и го симболизира Неговото влегување во овој свет, во нашите домови, во нашите срца – вели отец Зоран.