Злате Мехмедовиќ, портпарол на Комисијата за заразни болести вели дека листата на лекови кои ќе може да се земат од матичниот лекар, а за кои порано се одеше на специјалист ќе се проширува. Тој во интервју за утринската програма „Слободен печат“ на Слободна ТВ дели дека е потребна трансформација на здравствениот систем. Со неа ќе се направат напори и онколошките пациенти терапијата да ја добиваат преку матичните лекари наместо постојано да патуваат од внатрешноста во Скопје.

-Терапијата кај онколошките пациенти е посебна болка. Имав неколку средби со нивните здруженија и ме замолија да се изнајде начин таа терапија полесно да дојде до пациентите. Во Министерството за здравство доставен е план и програма на која се работи. Ова е со цел да нема шетање на пациентите од внатрешноста до главниот град каде треба да се земе терапијата- вели Мехмедовиќ.

ВИДЕО ИНТЕРВЈУ | Д-р Мехмедовиќ: Магарешката кашлица трае сто дена, има два случаи во јануари – едниот импортиран од Данска

Според него ова наскоро ќе треба да се имплементира.

– Мора да се направи трансформација посебно на примарното здравство. Тоа значи поголема достапност на услугите. Ова беше само почеток со кој лековите полесно се достапни до пациентите. Во изминатите три месеци откако е започната реформата вкупно беа препишани над 300.000 лекови од матичните лекари за пациенти. Ако не се препишаа пацинетите ќе мораше да одат на специјалист. Тоа значи дека 123.000 термини во „Мој термин“ се ослободија со ваков систем на промена на режим на препишување на лекови. Се растовари секундарно здравство- вели Мехмедовиќ.

Тој најави за јануари уште една новина, за олеснување на работата на матичните лекари, а тоа е укинување на двојниот начин на евиденција кај матичните лекари.

-Апсолутно непотребно е двојна евиденција. Хартиена документација треба да се пренесе во компјутер. Податоците на хартија се многу потешки за анализа од тие кои се на компјутер- вели Мехмедовиќ.

Според него постојат тековни промени, во тек се консултации со матичните лекари, со фармацевтите, со сите засегнати страни со цел да не дојде до оптоварување на здравствениот систем.

-Договорена е динамика за следните три години по кој редослед ќе се одвиваат работите- вели Мехмедовиќ.

ВИДЕО ИНТЕРВЈУ | Мехмедовиќ: Од 10 невакцинирани деца со МРП кои имале морбили, пет биле со аутизам

Со него разговаравме за магарешката кашлица, за вакцинацијата против сезонски грип, но и за тековната вакцинација против заразни болести.

Целото интервју погледнете го во продолжение: