Има ли Македонија генијалци и иноватори? Што креираат генијалците и по што се издвојуваат од своите врсници? Колку иновации има во државава и колку се иновативни нашите поединци, а на колку се работи? Прашања на кои малкумина го знаат одговорот. „Слободен печат“ ќе се обиде преку серијал да обезбеди барем мал дел од одговорите и да им даде шанса на генијалците и на иноваторите да ѝ ги претстават своите креации и идеи на пошироката јавност. Креатори на игри, успешни шахисти, инженери, научници, балерини… се само дел од ликовите што ќе бидат дел од нашиот серијал. Се надеваме дека на ваков начин ќе ја поттикнеме јавната свест но и надлежните институции да се издвојуваат повеќе средства за оваа намена, да најдат начин да ги промовираат нивните идеи онаму каде што треба за подобро утре за сите нас. Воедно, ова нека биде и отворен повик до сите што сакаат да ги споделат своите успеси и иновации со нас, но и со целата јавност, да се пријават на официјалната имејл адреса.

Борис Јанковски е македонски иноватор кој има фирма-лабораторија. Меѓу многуте иновации кои ги продава по светот тој создал сува пена за гасење на пожар која делува за неколку секунди. Неговата фирма опстојува повеќе од 30 години.

– Во минатото стана актуелно да се забрани најдобриот систем кој постоеше за гасење пожар. Ние на тоа веднаш имавме одговор, создадовме цврста супстанција, која пред сè, ги исполни сите еколошки услови, да не делува штетно на озонскиот слој, да не делува на глобалното затоплување. Системот на гасење е сув, да не ги оштетува предметите во просторијата каде што гаси, и најважното, за да можете да го изгасите пожарот најкратко, за неколку секунди. Тоа беше причината да навлеземе подлабоко во оваа област-вели Јанковски.

Тој објаснува дека целата суштина е во хемиската супстанција за гасење, технолошкиот процес е стандарден процес.

Јанковски е активен иноватор долги години. Почнал многу млад.

– Тогаш постоеше „Народна техника“ која беше нашето собиралиште каде што се случуваа работи. Потоа ме заинтересира хемијата, во тоа време беа многу актуелни космичките летови, лансирање на сателити, тоа се објавуваше на цела страница во весниците. Така почнав да се интересирам за таа оскудна литература која ја имаше во тоа време. Немаше многу литература на таа тема, немаше компјутери, па и телевизори немаше тогаш. Уште на четиринаесет години направив некој барут по дома, ја запалив бањата, после тоа беше моето прво бегање од дома, бидејќи ќе беше ќотек, наградно-вели Борис.

По завршување на гимназија се сели во Белград, таму нашол истомисленици, пак околу организација на „Народна техника“.

– Се создаде еден колективен дух да ние нешто направиме во таа област бидејќи космичката техника навистина беше предизвикувачка. Почнавме да работиме сериозни проекти, па дури и да направиме сериозни мотори … До сега со мојот тим заедно имаме објавено преку стотина научни трудови во најеминентни списанија и конгреси во светот-вели Јанковски.

Првата компанија ја основал за производство на ракети за модификација на време во 1979 година која благодарение на поддршката која ја добил му била обезбедена солидна количина на пари за да ги реализира неговите идеи и да покаже дали вредат.

– Ние за кратко време ги покажавме нашите резултати кои ги презентиравме на конгрес во Америка кои беа од „Руската академија на науки“. Тоа беше доволен основ да ни дадат шанса да го валоризираме тоа. Така настана првата фабрика „Макпетрол Темко“ каде што сите тие идеи имавме шанса да ги реализираме. Постигнавме доста добри резултати, некои резултати допрва требаше да следат, но, со растурањето на државата се растурија и тимовите-вели Борис.

Ова бил мотив да опстојат, да направат приватна фирма. Набргу добиле неколку сериозни проекти. Постојат триесетина година.

– Моите сознанија ги продавам во светскиот пазар. До сега сме успеале да продадеме во повеќе држави, последното беше во Јужна Кореја, да направиме комплетна фабрика за „Ел Џи“. Денес немате едноставен производ, сите производи се многу високо софистицирани, проследени со системи со логистика за да изврши некоја функција, и за таква работа треба да имате тим, значи, треба да имате група, и која личност која ќе биде лидер на таа група ќе се соберете и со заеднички сили ќе го направите. Тука се наметнува прашањето на финансиите. Било каква работа во област на техника, има потреба од материјали. Поезија може да пишувате и на колено, но, да решите некој технички проблем за да настапите на светски пазар треба да имате околина која ќе ве подржи-вели Јанковски.

Целото интервју на колешката Агнеса Чаволи погледнете го во продолжение: