Една година помина од почетокот на војната меѓу Русија и Украина. Според досегашниот развој војната продолжува без најава од двете страни дека во блиско време може да се види почетокот на нејзиното завршување. Борбите неколку месеци се водат во Бахмут, град во источниот регион Доњецк каде што пред војната живееја околу 70.000 луѓе, а денес се проценува дека има околу 5000 жители е воена цел на руските воени сили.

-Според нивото на воените операции што се направени досега во XXI век во Бахмут се едни од најголемите, а тоа се гледа според интензитетот и капацитетот на оружјето што се употребува, односно артилериските средства што се користат и жестината на нападите. Овде станува збор за завојувани страни што користат исклучиво конвенционално оружје и затоа жестокоста е толку голема. Според западните аналитичари и медиумите што информираат за овој дел од воените операции не придаваат големо значење на Бахмут и нема стратешко значење. Истоврмено, руската воена доктрина и логика на војување е различна во поглед на ставовите на западните теоретичари. Првиот проблем што се јави кај руската војска беше недоволната логистичка поддршка на армијата што брзо продира и зазема територија. Имено, оваа поддршка не беше континуирана и целосна. Ако Бахмут биде воено заземен, тогаш руската армија има физички мост за префрлување на други воени единици и за непречена логистичка поддршка на армијата. Ова го истакна професор Методи Хаџи Јанев во денешниот разговор во емисијата Утрински печат на Слободна ТВ.

Воените операции продолжуваат и на повидок нема најави за прекин на воените дејствија о уште помалку поддрѓка на мировни иницијативи.

-Факт е дека во ситуација кога Русија би освоила поголема територија во регионот на Доњецк и други населени места и градови дека тоа е би можело да се оцени како Пирова победа или победа со многу жртви и загуби. Историски гледано Русија војува со поднесување големи жртви и ова за неа не претставува проблем. Наспроти неа, по изјавите на украинскиот претседател Зеленски, војската на Украина ќе мора да се повлече од Бахмут, бидејќи трпи големи удари и има загуби и украинските команданти од воен аспект предлагаат дека армијата мора да се повлече во спротивно би била поразена. Во случај на освојување на Бахмут, како што реков тоа ќе биде Пирова победа на Русија, а со оглед дека не војува регуларната руска војска, туку воената група, позната како Вагнер, произлегува дека во случај на пораз тие би биле најголемите жртви. Втор аспект е дека за Русија ова претставува морална победа затоа што воените дејствија околу Бахмут траат долго, од една страна и затоа што победета реално во нивната руска приказна претставува пркос или во инат на западните држави како одговор дека не можела да направи пробив во овој дел на фронтот – истакна професор Хаџи Јанев.

Има анализи што укажуваат за поврзување на руско-украинската војна со други конфликтти околу украинската граница, конкретно со Молдавија во регионот на Придњестровје каде што од 1990 година тамошното население прогласи независност од молдавската држава и бара спојување со Руската федерација.

-Сознанието што го имаме и логиката што ја градиме за оваа војна се темели врз информации од западните медиуми, а не располагаме со информации од руски извори и од таму перцепцијата што ја имаме за целокупната ситуација е резултат на тие извори. Сметам за целосен и правилен увид во оваа војна е пожелно да ги погледнеме состојбите и процесите од руски аспект што не значи однапред поддршка на војната и нивните воени операции. За руската воена доктрина се покажува дека времето како категорија при војување е релативно, односно перцепцијата е дека на запад му се брза со завршување на воените дејствија – истакна професор Хаџи Јанев.

Ситуацијата во Молдавија во регионот на Придњестровје може да биде иницијално и потенцијално ново конфликтно подрачје, независно од руско-украинската војна, од една страна и може да се очекува и да се интензивира како резултат на освојување поголема украинска територија од стрна на руската армија евентуално поврзување со Крим и поврзување со овој регион.

-Оперативно тешко може да ескалира воениот конфликт во овој регион или да се префрли во него како резултат на руско- украинската војна, поради одреден број руски војници, околу 1500, што се наоѓаат во тој регион од деведесетите години и кои се непознаница во воен капацитет. Ескалацијата на воениот судир на оваа територија предизвикува овие војници однапред да бидат жртви зашто се отсечени и не може да се заштитат. Втор елемент што влијае врз овој регион е сознанието дека Придњестровје во изминатиот период стана депо на оружје и може да го земат и да го употребат. Руската армија во овој период, според распоредот на своите воени единици тешко може да дојде од причина што прво треба да освои јужен дел од територијата на Украина, како што се Одеса и Крим. Сутуацијата во Молдавија може да се очекува да ескалира со забелешка дека властите ја имаат општествената ситуација под контрола. Молдавија покажува слабост како држава чија администрација е од претходните режими и може да се очекуваат саботажи и слични дејствија. Засега Русија нема интерес да дојде до ескалација на состојбата во Молдавија, но може да ја одржува таа латентна конфликтност за да создава тензии спрема западот, вели Хаџи Јанев.

Целиот разговор со проф. Методи Хаџи Јанев погледнете го во видеото: