Очниот хирург и претседател на Асоцијацијата за офтална хирургија д-р Дејан Ставриќ, вели дека катарактата како најчесто очно заболување, во денешно време се јавува десет години порано, кај значително помлади пациенти и сето тоа е поради влошен квалитет на животот и повисокото ниво на стрес на кое се изложени луѓето. Дополнително, компликациите поради шеќерната болест петкратно се зголемени во последните две децении, заедно со васкуларните проблеми проследени со крвавења, инфаркти во окото и дијабетичната катаракта, предупредува специјалистот.

-Во споредба со развиениот свет, пациентите во земјава се во понеповолна здравствена состојба и сите клиничари кои работат повеќе од една или две децении во својата област ќе ви кажат дека сите заболувања, вклучително и очните заболувања се јавуваат многу порано, на порана возраст отколку пред две-три децении. Сега има многу порана појава на цереброваскуларни инциденти, инфаркти и дијабетес кој е во експлозија. Катарактата сега се појавува десет до петнаесет години порано како резултат на послаб квалитет на живот, полоша исхрана и повеќе стрес. Тоа е поразително, зашто се почесто гледаме хоспитализирани млади луѓе на 40 години, кои лежат во болница за болести за кои би требало да ги добијат на 80 години. Второто најчесто заболување е глаукомот, кој најчесто случајно го пронаоѓаме кај пациенти што на преглед доаѓаат од други причини, вели доктор Ставриќ во разговор во Утрински печат.

Според него, најчестите грешки кои луѓето ги прават е тоа што не се контролираат кај лекар навремето и редовно.

-И за здрави луѓе еднаш годишно е високопрепорачливо да имаат офтамолошки преглед зашто постојат заболувања кои се асимптоматски, како глаукомот. Затоа го нарекуваме „крадец на видот“ затоа што пациентот, генерално не чувствува ништо, а болеста работи. Со периодични редовни прегледи тоа може да се открие и да се лекува на време без последици, советува доктор Ставриќ.

Специјалистот објаснува дека иако операцијата за катаракта е најстандардизирана метода, сепак таа не би смеело да се симплифицира.

-Кај нас секоја операција е сериозна, зашто со нашиот менталитет, луѓето одат на интервенција кога веќе мораат, а тоа значи дека катарактата е позрела и хируршки покомплицирана.

Во разговорот во Утрински печат, доктор Ставриќ откри дека неодамна е формирана македонска Асоцијација за офтална хирургија каде тој е претседател. Потребата од формирањето ваква асоцијација е поголема комуникација меѓу институциите и лекарите но и стремежот лекарите да раководат со своите струки а институциите на системот да имаат вистинска и стручна насока за развојот на оваа област.

Коментирајќи ги последните штрајкови во здравството поради хакираниот систем на Фондот за здравство од перспектива на поранешен лидер на Синдикатот на Клинички Центар, доктор Ставриќ изјави дека и денеска во здравството функционираат модели започнати од минатата власт, а кои не се променети и сите ги чувствуваат последиците кои резултираат со масовно незадоволство. Според него, организацијата на приватното и државното здравство, треба да биде на начин тие меѓусебно да се натпреваруваат и да се подобри квалитетот на здравствената услуга, што во Македонија е неостварена мисија.

– Постои масовно незадоволство од здравствената услуга, кое е реално. Моделите кои беа насловени како „плаќање по учинок“ беа еден комунизам во здравството кој е недозволлив и претставуваа рушење на нормалната хиерархија. И се воспостави овој систем, кој е таков каков што е. Тоа пациентите и лекарите најдобро го знаат. Никој не е задоволен во здравството. Лично не можев да се согласам да работам и живеам во таков амбиент кој е тотално виртуелен и штетен по здравјето и го напуштив јавното здравство 2014 година. Меѓутоа и здравството и пациентите останаа заложници на тој ступиден систем, тврди Ставриќ.

Во разговорот во „Утрински печат“ може да слушнете совети од доктор Ставриќ за тоа како да се зачува видот во услови на зголемена дигитализација, кои се најчестите дијагнози со кои се соочува детската популација, како и некои практични совети, на пример – дали е добро да се купуваат очила без претходен преглед од специјалист.