Има ли Македонија генијалци и иноватори? Што креираат генијалците и по што се издвојуваат од своите врсници? Колку иновации има во државава и колку се иновативни нашите поединци, а на колку се работи? Прашања на кои малкумина го знаат одговорот. „Слободен печат“ ќе се обиде преку серијал да обезбеди барем мал дел од одговорите и да им даде шанса на генијалците и на иноваторите да ѝ ги претстават своите креации и идеи на пошироката јавност. Креатори на игри, успешни шахисти, инженери, научници, балерини… се само дел од ликовите што ќе бидат дел од нашиот серијал. Се надеваме дека на ваков начин ќе ја поттикнеме јавната свест но и надлежните институции да се издвојуваат повеќе средства за оваа намена, да најдат начин да ги промовираат нивните идеи онаму каде што треба за подобро утре за сите нас. Воедно, ова нека биде и отворен повик до сите што сакаат да ги споделат своите успеси и иновации со нас, но и со целата јавност, да се пријават на официјалната имејл-адреса.

Марко Ангеловски е матурант кој пред неколку месеци ја објави својата прва игра за мобилен телефон. Станува збор за играта „Спејс Ивејдерс“ која засега е достапна само за андроид телефони. Дизајнирањето игра, отсекогаш му било интересно, бидејќи во себе содржи елементи од повеќе сфери, од графички дизајн, од анимација, звучни ефекти, музика. И програмирањето е всушност еден многу мал дел од развивањето игри.

– Развивањето игри многу ме потсетува на лего-коцки, кои како помал ми беа пасија- вели Марко.

На 10-11 години по купувањето на неговиот прв таблет, Марко почнал да се интересира за технологија.

-Кога дојде време да го купам мојот прв компјутер татко ми ми кажа дека сам ќе ги одберам деловите и сам ќе го склопам, и ова на некој начин го отвори тој свет на компјутери. Со игри се занимавам уште од четиринаесет години и отсекогаш ме интересирало како всушност тие функционираат и како се создаваат- вели Ангеловски.

По ова следувале курсеви за програмирање со кои ја добил основата, основното знаење кое му требало и почнал да работи на сопствени проекти.

-Првата игра што ја изработив беше по урнек на „Супер Марио“. Кога ја добив идејата за играта Спејс Ивејдерс, знаев дека оваа игра може да прерасне во хит, и знаев дека мора да ја завршам. Направив прототип на играта, отидов во училиште, ова го направив во период од две-три недели, им ја покажав на моите пријатели, дадов да поиграат, и кога ја видов нивната реакција, дека им се допаѓа и дека е нешто кое би го играле во слободно време, одлучив да ја завршам- вели Марко.

Со оваа игра учествувал и на државен натпревар на кој што освоил трето место, и тоа му било понатамошен поттик за играта да ја заврши и пушти на „Гугл Плејстор“.

-Дизајнирањето игра, отсекогаш ми било интересно, бидејќи во себе содржи елементи од повеќе сфери, од графички дизајн, од анимација, звучни ефекти, музика. И програмирањето е всушност еден многу мал дел од развивањето игри. Во однос на развивањето игри, во моментот работам на два концепти, и како што кажав, работам на изработка на верзија на „Спејс Ивејдерс“ за „ајфон“. Во моментов сум матурант, така да, најмногу сум фокусиран на барање на факултети тука и во странство. Одлуката дали ќе останам тука или во странство зависи од тоа што ќе биде понудено- вели Марко.

Целото интервју на колешката Агнеса Чаволи погледнете го во продолжение: