„Слободен печат“ во поддршка на старите занаети од Скопската чаршија. Преку интервјуа со занаетчиите ќе се обиде да ги спаси од заборав, да ги запозне младите генерации со традицијата која со векови се одржува во Чаршијата. Можеби прилозите ќе бидат поттик за некој млад човек некој занает да го одбере за своја идна професија и со тоа да ја продолжи традицијата. Со тоа ќе ги спаси дуќаните од трајно затварање.

Јасин Ахмет е сопственик на кафулето „Мола“. Ќе речете кафетерија како кафетерија, но оваа е посебна. Овде филџаните за кафе и чашите се заменети со кокос. Кафето се пие во кокос. Менито е различно, класично кафе, кафе со додатоци, со млеко или без. Јасин бизнисот го започнал во време на пандемија, седел дома и размислувал за тоа што треба да направи за да ја надмине состојбата во која се наоѓа.

– Тежок период беше депресивен, тежок за секој човек. За мене тогаш имаше доволно време да се посветам на себе, да поработам на себе. Тогаш дојде и идејата за кафе „Мола“. Самиот збор на турски значи кратка пауза, да седнеш да се одмориш, напиеш нешто и продолжиш- вели Ахмед.

Занаетот го научил како мал, не се наоѓал себе си во ова работа, но со тек на време ја засакал.

-Ова беше мое маало и затоа овде го почнав бизнисот. Мое место беше Чаршијата и овде решив да го отворам кафулето. Немав идеја на почеток, но седејќи дома се кристализираше се. Во Старата скопска чаршија буквално, почнаа луѓето да доаѓаат само за тоа, да пијат кафе во кокос во „Мола“- вели Јасин.

 

Во неговата улица немало кафетерија, имало златари, ташнар, продавница за сребро…

-Го направив просторот со другари, сам и со нивна помош. Многу ми помогнаа колегите, сопствениците на дуќаните. Странците се воодушевени од кафетео кое се служи во кокос- вели Јасин.

Туристите неговото кафуле го наоѓаат пред да допатуваат во земјава и вообичаено доаѓаат овде.

-На почетокот не знаев ништо за кафето. Учев од ресторан кај вујко ми. Се срамев да ја работам оваа работа, не сакаа моите да бидам келнер. Во Чарчија се едно исто се пие, турско кафе, чај, лимонада боровница. Јас им дојдов како освежување. Ова кафе во кокос го има само кај мене- вели Ахмед.

На младите им порачува да бидат само сигурни во тоа што го знаат.

-Прво треба да ја знаат работата, значи, секако, да започнат со таа работа што перфектно ја знаат, и дури ја работат, цело време да додаваат нешто од себе, цело време да вметнуваат нови идеи- вели Јасин.

Целото интервју на колешката Агнеса Чаволи и постапката како се прави кафе во кокос погледнете го тука:

Во петок очекувајте го интервјуто со часовничарот Горан Домазетов.