Во Реонскиот центар во општината Аеродром денеска е поставен камен-темелникот на нов малопродажен објект на германската компанија „Лидл“. Новиот објект ќе се протега на површина од 3.438 квадратни метри, со модерен продажен салон од 1.200 квадратни метри и 57 паркинг-места за посетителите.

За премиерот Христијан Мицкоски ова не се само бројки туку порака дека компанијата влегува сериозно на македонскиот пазар со визија за долгорочен раст и развој.
– Менаџментот на „Лидл“ ја прифати нашата забелешка за зголемување на застапеноста на македонските производи на полиците на „Лидл“, што е од исклучителна важност затоа што со тоа се поддржува локалната економија и се гради доверба кај потрошувачите дека македонското е најдобро. Македонски производи не само што ќе се наоѓаат на полиците на „Лидл“ во Македонија, туку веќе се на полиците на „Лидл“ во околните земји. Во 2024 година извозот беше 5 милиони евра, а годинава очекуваме да достигне 10 милиони евра и да продолжи да расте – рече Мицкоски.

Компанијата „Лидл“ интензивно го гради и првиот продажен објект во Скопје, кој се наоѓа на просторот каде што порано се наоѓаше „Бриколаж“ во општината Гази Баба.
Извршниот претставник на „Лидл“ Милена Драгиска-Денчева истакна дека очекува за неколку месеци да се отворат вратите за граѓаните на општината Аеродром и за граѓаните на Македонија.