Неопходна е што побрза декриминализација на сексуалната работа, порача денеска во Утрински брифинг извршната директорка на ХОПС- опции за здрав живот, Хајди Штерјова-Симоновиќ.

-Во Македонија сексуалната работа сè уште е прекршок, се казнува со глоба од 600 до 800 евра согласно Законот за прекршоци доколку сексуалните работници бидат фатени на јавно место во моментот на давање на сексуална услуга. Но, се случило и да бидат криминализирани со одредени кривични дела кои се пропишани во Кривичниот законик како на пример што се злоупотребува членот 205 а кој се однесува на пренесување на заразни болести, објаснува Штерјова-Симоновиќ.

Портпаролот на владата Душко Арсовски вчера соопшти дека со измени на Кривичниот законик ќе бидат опфатени и сексуалните работници. Тој објасни дека се воведуваат нови кривични дела, како што се полов напад и полово вознемирување, но тоа сепак не наиде на задоволство на сексуалните работници и на организациите кои се занимаваат со нивните права.

–Како прво терминологијата која сакаат да ја употребат за тие нови дела како полов напад е застарена терминологија. Треба да се нарекува сексуален напад, но тоа е дело кое се однесува кога нема согласност од двата актери во играта. Кај нас е регулирано на начин на кој жртвата мора да дава отпор, но во некои ситуации жртвата не е во можност да даде отпор, можеби затоа што е под дејство на психотропни супстанци. Тоа сепак не значи дека дала согласност за интимен однос. Тие дела кои ги спомна портпаролот на Владата се однесуваат на тоа, но при декриминализација на сексуалната работа мора да се земат во предвид членот 205 и членот 191 од Кривичниот законик, вели Штерјова- Симоновиќ.

–Заедницата на сексуални работници бара признавање на сексуалната работа како професија по слободен избор, со што таа ќе стане дел од пазарот на трудот, а сексуалните работници ќе бидат препознаени како работници. Ние трета година по ред заедно со СТАР-прв колектив на сексуални работници на Балканот и Коалиција Маргини бараме декриминализација на сексуалната работа преку одбележување на овој меѓународен ден. Сакаме да упатиме и порака дека сексуалните работници се еднакви со нас и дека треба да им се унапредат човековите и работничкита права. За жал сексуалните работници во Македонија се уште не се доволно охрабрени во лично име да зборуваат за нивните права, затоа ние како организации ги поддржуваме, објаснува Штерјова- Симоновиќ.