Американскиот министер за одбрана Пит Хегсет ѝ нареди на морнарицата да  преименува еден од своите воени бродови кој го носи името на Харви Милк, ветеран од корпусот и активист за права на хомосексуалците, кој беше убиен кон крајот на 1970-тите, соопштија денес американските медиуми.

Military.com, повикувајќи се на неименуван функционер, соопшти дека добил и документ од морнарицата во кој се вели дека овој потег е дел од желбата на Хегсет да „ја обнови културата на војната“ во вооружените сили на САД.

Ројтерс, исто така, цитираше американски функционер, кој побара да не биде именуван, кој изјави дека директивата за промена на името на бродот дошла од канцеларијата на Хегсет.

Во 2016 година, американската морнарица објави дека ќе именува еден од своите нови танкери по Харви Милк, ветеран од корпусот кој подоцна стана еден од првите геј граѓани избрани на јавна функција (како член на Одборот на супервизори, градскиот совет на Сан Франциско) и беше убиен во 1978 година, додека сè уште ја извршуваше таа функција.

Друг американски медиум, CBS News, објави дека се разгледуваат и други бродови за преименување, вклучувајќи два именувани по поранешните судии на Врховниот суд, прогресивната Рут Бадер Гинсбург и првиот афроамерикански судија на Врховниот суд, Тергуд Маршал.

На прашање од АФП, Пентагон одговори преку својот портпарол, Шон Парнел, дека „секоја можна промена на името“ ќе биде „објавена откако ќе бидат финализирани внатрешните процедури“.

Пит Хегсет „сака да се осигури дека имињата на сите објекти и средства на Министерството за одбрана ги одразуваат приоритетите на врховниот командант, историјата на нашата нација и нашиот воен дух“, додаде тој.

Откако Доналд Трамп се врати на претседателската функција во САД во јануари, републиканската администрација спроведува широка офанзива против политиките што промовираат различност.

Демократската опозициска фигура Ненси Пелоси остро го критикуваше во соопштението „срамното и одмаздољубиво бришење на оние кои се бореа да ги соборат бариерите и да им овозможат на сите да го живеат американскиот сон“.

„Оваа злонамерна иницијатива не ја зајакнува нашата национална безбедност или нашиот воен дух. Наместо тоа, таа претставува напуштање на фундаментална американска вредност: почитување на наследството на оние кои работеа за изградба на подобра земја“, додаде таа.

Лидерот на малцинството во Сенатот, Чак Шумер, рече дека потегот за преименување на танкерот е „одвратен“ и „бесрамна дискриминација“. „Хегсет треба да се засрами и веднаш да го повлече ова“, напиша Шумер на Икс.

Харви Милк е роден во 1930 година во Њујорк  служел во американската морнарица за време на Корејската војна во 1950-тите.

Во Сан Франциско, тој подоцна стана првиот геј градски советник во Калифорнија и фигура на првата линија во борбата за правата на хомосексуалците. Тој беше убиен во 1978 година, а еден танкер за снабдување на морнарицата беше именуван по него во 2021 година.