Хамас испрати писмо до американскиот претседател Доналд Трамп, барајќи од него да гарантира 60-дневен прекин на огнот во Газа – каде што израелската армија ги продолжува своите копнени окупациски операции – во замена за ослободување на половина од преостанатите 48 заложници.

„Фокс њуз“ ја објави веста во понеделникoт, повикувајќи се на висок функционер од администрацијата на Трамп и извор вклучен во преговорите.

Извор запознаен со прашањето го потврди извештајот за „Тајмс оф Израел“.

Сепак, не е јасно дали во писмото се осврнува и на прашањето за разоружувањето на Хамас, израелско барање кое организацијата го отфрли.

Според „Фокс њуз“, писмото на Хамас до Трамп моментално се наоѓа во Катар, посредник во разговорите, и ќе му биде доставено на американскиот претседател подоцна оваа недела.

NEW: Hamas wrote a letter to President Trump asking him to personally guarantee a 60-day pause in Gaza in exchange for immediately releasing half of the hostages, Fox News has learned from a Senior Trump administration official and a second source directly involved in the talks. pic.twitter.com/GynGHGx2xB

— Trey Yingst (@TreyYingst) September 22, 2025

Лидерите на Хамас сè уште не го потпишале писмото до Трамп, но може да го сторат тоа во наредните денови, според извор цитиран од Канал 12.

Во меѓувреме, Трамп денес треба да се сретне со арапски и муслимански лидери во Њујорк за да го претстави својот план за ставање крај на војната во Газа за прв пат.

Веста за писмото дојде откако Хамас објави пропагандно видео на заложникот Алон Охел и семејствата на заложниците како се собираат пред резиденцијата на премиерот Бенјамин Нетанјаху во Ерусалим, барајќи договор за прекин на огнот и повлекување од активните операции.

Семејствата на заложниците се сретнале и со началникот на Генералштабот на Израелските одбранбени сили, кој наводно им рекол дека врши притисок врз владата да постигне договор за прекин на огнот и повлекување.