Кошаркарите на Индијана Пејсерс поведоа со 3-1 во финалната серија на Источната конференција откако на домашен терен го совладаа Њујорк никс со резултат 130-121. Победата ги доближи само на еден чекор до големото финале каде последен пат играа пред 25 години.

Главниот херој на Пејсерс беше Тајрис Халибартон, кој одигра историски натпревар со трипл-дабл учинок од 32 поени, 15 асистенции и 12 скока – сето тоа без ниту една изгубена топка. Со овој перформанс, Халибартон стана првиот играч во историјата на лигата кој постигнал трипл-дабл со над 30 поени и без загубена топка. На полувремето веќе имаше 20 поени, 10 асистенции и 9 скока, со што беше на чекор до подвиг уште во првото полувреме.

Натпреварот започна со високо темпо и неверојатна ефикасност и во првите 24 минути беа постигнати дури 133 поени. Двете екипи покажаа офанзивен квалитет, а тренерот на Никс, Том Тибодо, користеше дури десет кошаркари, нешто што не се случило во неговите тимови уште од деновите кога го предводеше Чикаго булс.

На полувремето Индијана имаше предност од пет поени, а клучната разлика ја направи во третата четвртина, кога Никс не погодија ниту една тројка, додека домаќините се „одлепија“ на +12. Гостите се вратија на само пет поени негатива во финишот, но немаа сили за целосен пресврт, па победата остана во Индијанаполис, прва домашна во оваа серија, по три последователни победи на гостински терен.

Покрај Халибартон, одличен настап имаше и Паскал Сијакам со 30 поени, додека Бенедикт Матуран уфрли 20, а Арон Несмит 16 поени. Кај Никс, Џејлен Брансон беше најпрецизен со 31 поен, а Карл Ентони Таунс запиша дабл-дабл со 24 поени и 12 скока.

Индијана ќе има шанса да ја затвори серијата веќе утре вечер во „Медисон Сквер Гарден“, каде веќе два пати триумфираше во ова финале на Истокот.