По лична желба, упокоениот архиепископ на Албанската православна црква Анастасиј денеска ќе биде погребан во православната црква „Воскресение Христово“ во Тирана.

Опелото почна во 11:00 часот, додека Божествената литургија почна претходно и со неа чиноначалствуваше Вселенскиот патријарх Вартоломеј.

Погребот ќе следи под олтарот на катедралата, во посебна крипта подготвена од самиот Анастасиј.

Во црквата се присутни и политичките лидери на Албанија, почнувајќи од албанскиот премиер Еди Рама и шефот на опозицијата Сали Бериша, претседателот на Албанија Бајрам Бегај, како и претставниците на исламската заедница во земјата.

Покрај нив е и грчкиот премиер Киријакос Мицотакис, кој по овој повод во Тирана пристигна со петмина министри од неговиот кабинет од пет министри, потоа претставничка делегација од Ватикан, која ќе ја предводат државниот секретар Пјетро Паролин, Цариградскиот патријарх Вартоломеј, патријархот на Израел и Ерусалим Теофил, грчкиот архиепископ Јероним, патријархот на Кипарската православна црква и претставници на Бугарската, Романската, Полската црква, делегација од Светскиот совет на црквите (институција која ги вклучува сите цркви, католичка, протестантска или православна), претставници од унијата „Религии за мир“ и делегација од црквите на Соединетите Американски Држави.

Граѓани од секој агол на Албанија со солзи во очите и цвет во рака доаѓаат во Соборниот храм „Воскресение Христово“ во Тирана да се простат од блажениот Архиепископ Анастасиј кој 32 години беше на чело на Албанската православна црква.

Тој почина минатата недела по кратко боледување во болницата во Атина каде беше донесен од Тирана поради влошената здравствена состојба. Неговото тело по упокојувањето со највисоки воени и државни почести од Атина беше испратено во Тирана и пречекано од илјадници православни верници во Албанија.

На архиерејскиот трон на Албанската православна црква привремено е поставен Корчанскиот митрополит Јован.